Ayiti – Sekirite/aksidan : Pou pi piti 1 moun mouri, 11 lòt boule grav ak anpil kay boule nan Sid
-jedi 14 mas 2013-
-
Pòtoprens 13 mas 2013 [AlterPresse] --- Nan mitan lannuit 12 pou rive 13 mas 2013 la, pou pi piti 1 moun ki mouri, 11 lezòt boule ak plizyè kay ki boule, nan lokalite mòn Sen Jòj, twazyèm seksyon kominal Sen Lwi di Sid, apre yon kamyon sitèn gaz te pran dife.
Pami 11 moun ki boule yo, genyen 3 ki grav. Gen youn (1) nan 3 moun sa yo ki mouri sou kabann lopital, daprè enfòmasyon pwoteksyon sivil nan Sid bay AlterPresse.
Gen 2 moun ki te mouri menm kote kamyon an te pran dife a, dapre sa
Korespondan radyo televizyon Karayib nan Sid peyi a rapòte, bò kote pa li.
Menm korespondan sa a di tou kouman jij de pè, ki te vin fè konsta a, te pral boule ak tout chofè li, an apre.
Yo pa bay okenn enfòmasyon sou sa ki lakòz kamyon gaz lan pran dife.
Pwoteksyon sivil nan Okay deklare yo pa rive jwenn chofè a. [srh kft rc apr 13/3/2013 8:25]
-
