Haiti

Ayiti-Rekonstriksyon : Yon nouvo lokal pou kou siperyè kont


-lendi 4 mas 2013-

-

Pòtoprens, 4 mas 2013 [AlterPresse] ---Vandredi premye mas 2013 la, prezidan Michel Martelly patisipe nan seremoni inogirasyon yon nouvo lokal pou kou siperyè kont lan.

Otorite yo te derefize plizyè medya asiste seremoni inogirasyon lokal tou nèf la.

Kesyon jounalis yo poze : èske inogirasyon sa a se te yon aktivite prive, kote yo ka envite moun yo vle, oswa yon aktivite piblik, kote tout medya an dwa al chèche enfòmasyon pou bay popilasyon an.

Te gen menm poblèm nan, lè bal renn ak wa nan Milo, samdi 9 fevriye 2013 la, lavèy kanaval Okap la. Lè sa a, yo te pouse do plizyè medya, derefize yo asiste ak kouvri seremoni piblik sa a.

Nouvo lokal kou siperyè kont lan chita nan avni Kristòf, nan Pòtoprens.

Se premye batiman administrasyon Leta, yo mete kanpe depi pasaj tranbleman tè 12 janvye 2010 la, dapre sa biwo kominikasyon prezidans lan fè konnen.

Malgre kay la konstrui, prezidant entitisyon an, Nonie Mathieu, plenyen dèske Kou siperyè kont pa gen ase ekipman, materyèl ak bidjè pou l fonksyone kòmsadwa.

Pou konstrui batiman Kou siperyè kont lan, sa te mande on ti kras plis pase 62 milyon goud, dapre chif ofisyèl.

Kou siperyè kont an chaje kontwole depans Leta yo, nan ki kondisyon yo fèt, èske yo fèt dapre prensip ak lalwa sou administrasyon piblik. Li an chaje to gade èske jesyon biwo Leta yo te kòdyòm pou yon peryòd.

Kou siperyè kont jwe wòl tribinal nan yon seri ka : sizoka gen poblèm nan jesyon yon biwo leta (li ka pran yon desizyon kont moun ki te responsab biwo Leta sa a).

Yon fonksyonè Leta ka pote plent tou devan kou siperyè kont, sizoka li panse yo ta fè l abi. [kft rc apr 4/03/2013 9:55]

-