Ayiti-Politik : 7 palmantè ameriken vin evalye sitiyasyon peyi a
-mèkredi 20 fevriye 2013-
-
Pòtoprens, 20 fevriye 2013 [AlterPresse] --- Yon gwoup 7 palmantè ameriken ap fè yon vizit enfòmasyon ak evalyason nan Pòtòprens (peyi d Ayiti) jou k ap jedi 21 fevrye 2013 la , daprè sa AlterPresse aprann.
Delegasyon ameriken sa a, ki gen nan tèt li senatè demokrat Patrick Leahy, ap soti Kiba, kote yo te gen yon chita pale avèk chèf Leta peyi sa a, Raul Castro.
Senatè Leahy se prezidan komisyon jistis sena ameriken an. Li te dirije yon delegasyon palmantè an Ayiti nan mwa fevrye 2012.
Lòt manm, ki nan delegasyon an, se senatè demokrat Sherrod Brown, Sheldon Whitehouse, Debbie Stabenow, senatè repibliken Jeff Flake ak 2 lòt manm chanm reprezantan yo ki se demokrat Jim McGovern ak Chris Van Hollen.
Palmantè yo ap gen pou yo pale ak otorite ayisyen yo, sitou ak prezidan Joseph Michel Martelly.
Vizit palmantè sa yo nan peyi d Ayiti ap fèt nan yon moman, kote gen gwo pwoblèm pou yo òganize eleksyon pou senatè ak lakomin yo. [emb kft rc ap 20/02/2013 11:50]
-
