Ayiti: Doktè Daniel Mathurin mouri nan yon aksidan machin nan Repiblik Dominiken
-lendi 18 fevriye 2013-
-
Pòtoprens, 18 fevriye 2013 [AlterPresse] --- Doktè, chèchè Daniel Mathurin, jwenn lanmò l nan yon aksidan machin, jou ki te dimanch 17 fevriye 2013 lan, sou wout Santiago (Repiblik Dominikèn), dapre sa AlterPresse aprann.
Mathurin mouri kèk èd tan aprè aksidan an.
Pitit fi li, Tamara Mathurin, fè konnen papa l te sou wout pou rantre nan peyi d Ayiti, lè li fè aksidan an.
Madanm li, enjenyèz Ginette Perodin Mathurin, te blese grav pandan aksidan sa a.
Divès sektè nan peyi d Ayit pran sezisman, lè yo aprann lanmò terib sa a : doktè Daniel Mathurin disparèt apre yon aksidan machin, dimanch apremidi 17 fevriye 2013, sou wout Santiago de Los Caballeros nan peyi Repiblik Dominiken.
Daniel Mathurin te konn pale anpil kesyon save sou antèn plizyè estasyon radyo ak televizyon pou l diskite sou aktyalite a, konsènan sitou domèn lasyans ak lakilti.
Doktè, chèchè Daniel Mathurin te prezante plizyè espoze sou patrimwan nan peyi Dayiti.
Nan sans sa a, li te fè, ansanm ak madanm ni, yon gwo rechèch syantifik sou « roche à l’Inde », nou jwenn nan “Camp-Coq” (toupre Lenbe) nan depatman Nò, ki sanse sou bout tè pa nou an depi 35 pou rive 100 milyon lane.
Daprè defen an, rechèch sa a montre aklè te gen yon sivilizasyon ansyen yo te rele "toltèk" ki te egziste sou teritwa sa a.
Doktè/jewològ Daniel Mathurin mouri ak 62 lane sou tèt li.
Se yon gwo pèt pou peyi d Ayiti, tèlman rechèch li te konn fè ak madanm ni, enjenyèz Ginette Perodin Mathurin, te konn pote anpil limyè sou divès sijè enpòtan pou peyi a. [emb kft rc apr 18/02/2013 13:55]
-
