Kominike Koalisyon Ayisyen pou Lajistis
Nouyòk, 19 desanm 2003
Koalisyon Ayisyen pou Lajistis wè kouman divès sektè nan peyi Dayiti leve kanpe pou yo pouse do Aristid nan tèt pouvwa leta a.
Sitiyasyon leve kanpe sa a montre aklè kouman rejim lavalas la echwe nan reskonsabilte l devan Pèp Ayisyen an, tankou: ranfòse demokrasi nan peyi a, mete kòd lajistis nan kou tout kriminèl ak tout volò, kwape koripsyon nan biwo leta yo epi fè lamizè fè bak nan peyi a.
Pèp Ayisyen an vomi pouvwa lavalas la jodi a poutèt lavalas toufounen aspirasyon chanjman pèp ayisyen an anba kout manti, kout lajan, kout baton ak kout fizi.
Pèp Ayisyen an vomi pouvwa lavalas jodi a poutèt lavalas tronpe tèt li lò li panse pèp la tap rete tankou yon zonbi kite l mennen l labatwa.
Pèp Ayisyen vomi pouvwa lavalas jodi a poutèt lavalas mete nan plà n revandikasyon fondalnatal mas pèp la pou l ranmase pwojè lanmò meriken an pou peyi a ki donnen lavichè, ensekirite, chomay, grangou, vyolans, kriz sou kriz eltÂ… Echèk pouvwa Lavalas jodi a se echèk plan neyoliberal la ki pa fouti rezoud gwo kriz sosyal peyi a ap travèse depi digdantan. Pèp la wè tou sa !
Se pou sa, Koalisyon Ayisyen pou Lajistis ap kore batay pou kwape Aristid la. Koalisyon an ap kontinye goumen kont pwojè lanmò enperyalis meriken genyen pou Ayiti. KAJ kanpe pou tout revandikasyon mas pèp Ayisyen an rive jwenn satisfaksyon.
Pou Koalisyon Ayisyen pou Lajistis:
Daniel Biko
Zéphyr Alain
Consulter +
