Ti chèz ba

Ayiti : Lide pwofesè Anil Louis Juste t ap defann yo pa mouri


jeudi 6 mai 2010

Kominike Sendika Travayè Anseyan Inivèsitè Ayiti
(STAIA)

Dokiman sa a vin jwenn AlterPresse 6 me 2010

Sendika Travayè Anseyan Inivèsite Ayiti (STAIA) a fè tout moun sonje pwofesè Anil LOUIS JUSTE ki se manm fondatè sendika a tonbe anbal 2 endividi ki t ap sikile sou moto nan ang ri Kapwa ak Laflèdichèn madi 12 janvye a. Dat 6 me a, se dat anivèsè nesans li. Li fèt 6 me 1957. Sil te toujou avèk nou, 6 me 2010 la t ap fèl 53 zan.

Pwofesè a se yon moun ki t ap goumen pou nou genyen yon lòt peyi. Se poutèt sa, li t ap batay kont aplikasyon politik neyoliberal la pou travayè entelektyèl tankou pwofesè te gen lavi miyò ak fòmasyon òtpòt. Li t ap batay pou sistèm peze souse a kaba, pou kondisyon lavi travayè manyèl yo tankou peyizan ak ouvrye yo chanje.

Li t ap goumen tou pou refòm fèt nan Inivèsite Leta a pou enstitisyon sa a devlope tèt li nan kad yon ansèyman ki marande ak rechèch pou rann reaylite a jan l ye a. konsa etidyan yo ki byen fome t ap gen zouti syantifik pou aji sou li pou transfome l nan enterè mas popilè yo.

Pwofesè a te bay anpil konkou nan kreyasyon divès òganizasyon e patisipe nan divès aktivite mobilizasyon pou batay transfòmasyon an jarèt. Nou panse fòs antichanjman andedan peyi a ki ta kraponen nan serye ak deteminasyon li mete nan goumen an ta deside etenn souf li.

Avèk lanmò pwofesè a nou pran yon gwo kou pou enpotans li te genyen nan travay sa a, men lide pwofesè a t ap defann yo pa mouri. Dèy tranbleman de tè 12 janvye 2010 la fè yo vin met absè sou klou, men li bay misye rezon. Katastròf sosyal sa a se resilta politik ki t ap aplike depi 1e lokipasyon ameriken an. Ki donk, sa montre nesesite pou batay pou transfòmasyon an kontinye. Konsa n ap mande pou etidyan, pwofewsè ak tout moun ki nan mas popilè yo, peyizan, ouvriye elatrye ranmase flanbo mobilizasyon an pou batay pou yon lòt sosyete nan non pwofesè a.

Pòtoprens, 5 me 2010

Pou STAIA,

Gaspard Leunique

Louis Alvares

Renel Exentus