Pozisyon Kolektif Solidarite Idantite ak Libète (KSIL)
Dokiman sa a vin jwenn AlterPresse 15 desanm 2009
Kolektif Solidarite Idantite ak Libète (KSIL) konstate ak anpil endiyasyon kòman sosyete sivil la ak klas politik la manke kouray ak detèminasyon pou bloke maskarad eleksyon lawont prezidans lan ap foure nan gagann pèp la.
Pozisyon woulem de (2) bò dirijan politik yo, ak endiferans konplis enstitisyon ki reprezante nan KEP la, se you move siyal pou moun ki te vle kwè nan you revèy sitwayen pou fè fas kare ak mannèv pou kontinye avili nasyon an.
Sosyete a pouri nan tout jwentil opwen yo ka panse pa gen moun ankò nan peyi a. Si w pa achtab lajan kontan, yo jwenn lòt fason pou fè pri w. Se pa nan Inite sèlman yo pase diyite moun anba pye; sosyete a ap benyen nan Inikite depi nan tèt jis nan pye. Se sou konpòtman agranman ti koulout sa yo ti nèg ki maton nan jere pouvwa makawon kanpe pou trennen diyite tout you nasyon nan labou. Sou pretèks pou pa abandone teren, sanble n ap pare pou danse dans mafreze. Pinga lè kabrit fin pase n ap di fèmen baryè.
Li klè jan koze a ap dewoule la a, prezidans lan ak KEP a ap plonje tout boulin pou mennen peyi a nan labim decheyans, kondisyon pou zòt vin taye banda toutouni. Se you gwo souflèt nan machwè tout moun ki kwè nan kapasite pèp ayisyen an pou leve defi tan an. Nou pa ta fè zansèt yo sa mezanmi. Nou paka krache sou listwa nou konsa. Nou pata fè timoun yo sa. Nou paka ap sapata prezan ak lavni you bann jenerasyon.
KSIL avwe desepsyon l, endiyasyon l ak feblès li nan moman an devan sitirasyon malouk sa a.. Men KSIL rete kwè nan rezèv moral ak kapasite reyèl pèp ayisyen an pou li reveye...
Nan kalfou tenèb peyi a ap travèse la a, KSIL ap kontinye chache chemen limyè a ak tout sila yo, nan tout sektè, ki kenbe etensèl lespri moun nan vivan nan yo. Vagabon ka fè briganday pou twouble somèy nou, men yo pap janm gen pouvwa pou anfouraye rèv nou.
POU YOU PEP LIB. NAN YOU PEYI GRAN MOUN.
Pòtoprens, 14 desanm 2009
POU KSIL
Jean Claude CHERUBIN.(Z0)
Consulter +
