Ayiti : Òganizasyon nan sektè sosyal la mande palmantè yo pou deklare MINISTA ilegal

Kominike Komite Suivi Nasyonal Ankèt Entènasyonal Sou Sitiyasyon Ayiti

Dokiman sa a vin jwenn AlterPresse 15 oktòb 2009

Depi 2004, peyi Dayiti ap sibi yon twazyèm okipasyon anba chapo Nasyonzini. Chak ane, pouvwa anplas la kole tèt li ak konsèy sekirite nasyonzini pou renouvle manda fòs okipasyon an, san dosye a pa janm pase devan palman an. Nan mwa jiyè 2004, gouvènman Gerard Latortue te siyen yon akò ak Nasyonzini sou fòs okipasyon an. Akò sa a mete sou tèt sòlda LONI yo chapo iminite enpinite ki ba yo dwa pou yo fè sa yo pito nan peyi a, san okenn otorite, menm lajistis paka di yo anyen.

Komite suivi nasyonal ankèt entènasyonal sou okipasyon peyi a mete deklarasyon sa a deyò pou mande palmantè yo pran responsablite yo sou dosye MINISTA a, ki se yon fòs okipasyon. Prezans fòs okipasyon sa a nan peyi a, se yon kadejak sou manman lwa peyi a ki di nan atik premye li : «Peyi d Ayiti sèl mèt lakay li. Li endepandan. Sitwayen l yo egal ego. Yo fèt pou yo viv lib, nan tèt ansanm, san youn pa kraze lòt, san youn pa fè lòt abi”. Akote kadejak sou konstitisyon an, sòlda LONI yo enplike nan fè kadejak sou fanm, kadejak sou dwa pou moun fè manifestasyon epi nan touye moun. Fòs okipasyon Nasyonazini yo enplike menm nan vòl. Lajan sòlda MINISTA vòlò nan pòch BS ak enplikasyon sòlda Samson Mangie nan lajan dwòg Pòdpè a, se 2 egzanp aklè ki montre enplikasyon sòlda yo nan zak vòl nan peyi a.

Malgre sa, dra iminite enpinite a kouvri yo. Pa egzanp, nan ka sòlda ki enplike nan lajan dwòg Pòdpè a, jij entriksyon an pa janm rive tande sòlda sa a akòz chapo enpinite li gen nan tèt li, sou baz akò chango 9 jiyè 2004 la.

Pou tout rezon sa yo, nou mande palman an pou li pran yon rezolisyon pou deklare MINISTA ilegal epi mande yo kite peyi a tousuit. Jan konstitisyon an mande l la, palmantè yo dwe mande gouvènman an pote akò sou fòs okipasyon an devan li. Atik 98-3/3 konstitisyon an di aklè « Asanble nasyonal la dwe di si li dakò oubyen si li pa dakò pou Ayiti siyen antant ak kontra ak lòt peyi » Nan sans sa a, n ap tann palmantè yo poze zak istorik sa a anvan dat 18 novanm, jou gwo batay vètyè a. Apati dat 18 novanm nan, si anyen pa fèt nan palman an, n ap konsidere tout depite ak senatè yo kòm palmantè MINISTA.

Pòtoprens, 15 oktòb 2009

Pou Komite suivi a :

Dukens RAPHAEL

Guy NUMA