Pòtoprens, 9 sektanm 2009 [AlterPresse] --- Konsèy sekirite nasyonzini (ONI) tanmen jounen mèkredi 9 sektanm 2009 la yon kokenn chenn reyinyon sou Ayiti.
Premye minis Ayiti, Michèle Duvivier Pierre-Louis, ap patisipe nan chita pale sa kote zotobre ONI yo ap etidye posiblite pou ta renouvle manda Misyon nasyonzini k ap estabilize Ayiti a (Minista).
Semèn ki sot pase a, Sekretè jeneral nasyonzini an te mande Konsèy sekirite a pou pwolonje manda Minista pou yon lòt ane ankò.
Ban Ki-Moon mande pou Minista kontinye asiste responsab peyi d Ayiti yo nan jefò y ap fè pou rive rezoud divès pwoblèm k ap bwase bil peyi sila.
Majòjon nasyonzini an rekonèt gen anpil pwogrè ki fèt nan estabilize peyi sa ki te tonbe nan gwo tèt chaje nan lane 2004 apre prezidan Jean Bertrand Aristide te fin pèdi pouvwa a.
Ansyen prezidan meriken an, Bill Clinton, ki okipe pòs anvwaye espesyal nasyonzini pou Ayiti, dwe patisipe nan reyinyon 9 sektanm la. Nan jou k ap vini yo, menm Bill Clinton sa ap gen pou fè yon vwèlta pa bò isit kote l ap gen biznismann etranje k ap akonpaye l.
Se nan dat premye jen 2004, fòs nasyonzini an te debake nan peyi d Ayiti pou te ranplase Fòs miltinasyonal enterimè a ki te tabli nan dat 29 fevriye 2004.
Manda Misyon nasyonzini an, qui genyen 7.060 sòlda, 2.091 polisye ak lòt pèsonèl sivil, dwe bout nan dat 14 oktòb k ap vini an. [do mm apr 09/09/2009 11:15]
Consulter +
