Kominike Kòdinasyon Nasyonal k ap Plede Kòz Fanm (KONAP)
Dokiman sa a vin jwenn AlterPresse 12 jen 2009
KONAP mande gouvèlman Preval/Duvivier Pierre Louis a, pibliye prese prese lwa 200 goud la nan Monitè ;
KONAP mande liberasyon san pèdi tan Etidyan ak lòt manifestan k ap manje prizon san rezon poutèt gwo ponyèt PNH ak fòs lokipasyon ap fè kont manifestan ak manifestant yo.
Sa fè plis pase yon mwa Palmantè yo depose lwa sou salè minimòm ki fikse jounen travay 200 goud devan Prezidan Preval pou pwomilgasyon, ki vke di piblikasyon lwa a nan jounal ofisyèl « Le Moniteur ». Jouk jodi a, lwa a kwoke.
Lwa a kwoke paske divès sektè retwogad, reyaksyonè, konsèvatè pa dakò pou travayè ak travayèz jwenn, menm yon ti alemye. Nou di yon ti alemye paske 200 goud la pap janm ase pou pèmèt travayè ak travayèz yo rekonstitiye fòs travay yo, lè nou konnen se san yo k ap seche nan izin soutretans sa yo.
Sa k pi grav nan reyaksyon n ap tande sou salè minimòm nan, menm chèf delegasyon Inyon Ewopeyèn ann Ayiti kwè li kab foure bouch li nan koze sa a pou apiye tèz ekonomis ayisyen fil arenyen fin kokobe sèvèl yo, kòmkwa 200 goud pral fè envestisè yo kouri al nan lòt peyi, kòmkwa 200 goud ta pral lakòz pi plis chomaj. Mouche Goseti ap makiye koze a, nan voye pinga pou gouvèlman an lè li deklare, si yo bay travayè 200 goud, anplwaye sektè piblik kapab mande ogmantasyon, Leta ayisyen pap kapab sipòte lòt ogmantasyon… Si nou t ap gade sou sa, pap janm gen jefò ki fèt pou konbat gwo inegalite ki genyen nan mitan divès kategori travayè/trvayèz k ap vann fòs travay yo, sitou ouvriye ak ouvriyèz ak tout lòt ki touche pi ba salè yo.
N ap mande mouche Goseti konbyen ewo yo peye yon ouvriye Italyen pou chak lè li travay ? Eske l te kapab kanpe nan peyi l oubyen nan lòt peyi Ewòp pou fè konnen ouvriye ewopeyen pa vo salè minimòm Palmantè yo vote ? Sòt ki bay, enbesil ki pa pran. Antouka, n ap fè Mouche Goseti sonje, si dirijan peyi yo lage tèt bese nan mete kwi yo devan enpeyalis oksidantal nan mande èd, pèp ayisyen an rete yon pèp ki gen diyite. Kidonk, li dwe fè atansyon pou pa konfonn 2009 ak reny ane 1800 yo. Nou koupe fache lontan ak kolonizasyon. Kesyon KONAP ap poze tout gwoup moun k ap pran pozisyon pou defann enterè « laboujwazi » peyi Dayiti a, depi tann dat nou gen 70 goud kòm salè minimòm, kote envestisè yo ? Pou ki sa gen kèk antrepriz an Ayiti ki ap aplike plis pase 200 goud la depi lontan san sa pa anpeche yo fè gwo benefis ?
Kanta pou dirijan peyi yo patikilyèman Preval, li montre klè, li chwazi kan « boujwazi » a, ki pa vle wè pi lwen pase enterè pòch yo. Se pou rezon sa a, depi 1e me 2009, chak manifestasyon mouvman sosyal la fè pou mande pibliye lwa sou salè minimòm nan, gouvèlman Preval/Duvivier Pierre Louis a voye Cimo ak Minustha kraze l nan bay gaz lakrimojèn. Se sa k te koumanse fèt lè divès òganizasyon nan mouvman sosyal ayisyen an te pran lari 1e me, se sa k kontinye fèt lè etidyan yo ap manifeste an solidarite ak ouvriye yo nan koumansman mwa jen an. Lapolis ba yo lakrimojèn, voye baton adwat agòch, arete moun alawonbadè.
Pandan KONAP ap mande prezidan Preval pou fè pibliye lwa sou salè minimòm 200 goud la nan Monitè, n ap mande otorite lajistis yo, pou libere san kondisyon, tout etidyan yo fèmen enjisteman nan prizon. N ap mande pou lage tout lòt sitwayen ak sitwayèn ki t ap manifeste solidarite yo ak kòz travayè/travayèz yo. N ap mande gouvèlman Preval/Duvivier Pierre Louis an, fèmen vann represyon yo louvri ak konplisite Minustha, nan bonbade popilasyon ak gaz fewòs yap simaye ak baton y ap voye devan deyè sou manifestan ak manifestant yo.
KONAP ap pwofite voye solidarite li bay tout travayè ak travayèz, epi mande sektè demokratik popilè a rete veyatif, pou defann premye viktwa 200 goud sa a. Tan n ap mande edityan ak tout lòt sektè k ap manifeste evite pwovokasyon, pa tonbe nan pyèj zak vyolans, epi veye woulibè.
KONAP ap fè tout moun sonje Konstitisyon 87 la ba nou dwa pou manifeste. N ap fè Mouche Preval ak Madan Duvivier Pierre Louis sonje, pèp ayisyen koupe fache lontan ak rejim bout di, epi yo toujou konbat rejim sa yo.
Aba tout fòs reyaksyonè k ap gade dèyè ki pa vle pibon kondisyon lavi pou
travayè ak travayèz
Viv mouvman sosyal la
Viv mouvman fanm nan
Chapo ba pou mobilizasyon etidyan yo pou konstriksyon yon sosyete ki chouke sou jistis sosyal
Pòtoprens, 12 jwen 2009
Pou KONAP,
Olga Benoit
Samia SALOMON
Komite Kòdinasyon KONAP : Enfofanm –Fanm Deside Jakmèl – Kay Fanm – REFRAKA -SOFA
Consulter +
