Ti chèz ba

Ayiti-Premye minis : De ki imoralite nou vle pale ?


jeudi 17 juillet 2008

Kominike Asosyasyon Orijinè GranPlenn (A.O.G) branch Diaspora

Dokiman sa a vin jwenn AlterPresse 15 jiyè 2008

Devan kanpay denigreman kap fèt sou do madanm Michèle DUVIVIER PIERRE LOUIS depi prezidan Rene Preval te fin deziye l nan pòs premye minis lan, nou menm manm sipòtè Asosyasyon Orijinè GranPlenn (A.O.G) k ap viv nan tout kwen nan djaspora a ki konnen madanm sa a pa aksyon li fè nan enterè peyizan lakay nou, nou vle mande Moralis kache yo : De ki imoralite yo vle pale ?

Eske se imoralite ki kenbe peyizan ajenou etan gwo MORALIS YO ap dechèpiye l chak jou onon lamoralite ?

Eske se imoralite kap tòchonnen peyi a pou l pa janm fè yon pa kita yon pa nago a ?

Eske se imoralite ki fè nou menm ki deyò pa santi n gen valè pou jan peyi nou an ap jere ?

Eske se imoralite ki plonje peyi a nan lamizè ke anpil MORALIS ap itilize pou fè lajan ?

Eske se imoralite kote yon seri nèg moute biznis tout kalite nenpòt kijan tankou bòlèt, legliz, fo lekòl …. pou piye peyi a nan je tout moun ?

Nou ta renmen tout moun ki kwè nan peyi ak tout moun ki kwè nan enterè pòch yo reflechi epi reponn kesyon sa yo.

Nou menm nou konnen Michèle DUVIVIER PIERRE LOUIS pa sa l fè ki bon pou peyi nou an anpil moun pran tan yo pou yo souse san respè pou pèsonn.

Nou mande moun kap pale anpil yo, medizan mal palan yo ki pa konn madanm nan al chèche konnen l nan sa l fè nan peyi a kap mache kòm modèl. Nou mande palmantè nou yo ke moun lakay nou te vote pou reprezante yo tankou depite nou an nan GwoMòn ak tout senatè nou yo ,pou yo pa trete dosye Michèle DUVIVIER PIERRE LOUIS a sou sa movèz lang ki kache dèyè rido ap voye moute men sou kapasite li ak eksperyans li nan sal remèt deja. Se imaj reyalizasyon l yo ak sa konstitisyon an di ki pou gide tout palmantè nan vòt chwa Michèle la. Si nou manke enfòmasyon al gade :

1.Lakay nou nan GranPlenn, na wè ki sa Michèle ta renmen pou peyi l nan yon seri domèn apre sa vote l pou n voye MORALIS yo al gade tèt yo nan glas.

2.Nan Vil GwoMòn pou n wè kijan timoun lekòl ap navige sou entènèt , travay sou konpitè depi lane 1998 pou sèlman 10 goud/èdtan

3.Mande nan tout lòt depatman yo pou nou wè zèv ak angajman Michèle, li kwè nan peyi l, li tout kote se yon gwo prèv moralite.

Menm jan ak tout lòt moun ki renmen peyi a, nou konnen madanm sa a pa gen difikilte pou poze vrè pwoblèm peyi a. Konsa nou mande pou nou chita pale koze yo klè pou tout moun konprann ki enterè ki devan. Pote agiman ki ka pèmèt pouse enterè peyi a pi wo pase enterè yon grenn moun oubyen fo MORALIS dèyè rido ki gen lòt enterè.

Depite ak senatè, pou dat yap site non nou nan zak imoral ak kòripsyon, se vre ou se pa vre ? Reflechi epi pran responsablite nou devan nasyon an !

Vòt yo dwe vize enterè ki ka retire mas yo nan kalamite yo ye jounen jodi a,

Vòt yo dwe bay direksyon klè pou ede jere resous peyi a nan benefis tout moun

Pou A.O.G branch Djaspora :

AXIL Rony, Lauderdale Lakes

CLAIRCIUS Luxen, New York

NORVILUS Lefran, Orlando

ARCHELUS Cirius, Fort Lauderdale