Kominike Kolektif Solidarite Idantite ak Libète
(KSIL)
Dokiman sa a vin jwenn AlterPresse 3 jiyè 2008
Kolektif Solidarite Idantite ak Libète (KSIL), leve vwa li byen wo pou denonse
kanpay k ap fèt depi kèk jou pou eseye sal repitasyon, salopete eskanp figi sitwayèn
Michèle (Michèl) Duvivier Pierre-Louis (Divivye Pyè-Lwi), depi lè Prezidan peyi a fi
n chwazi l, pou vin Premye Minis. Mank respè sa a ak mòd atak k ap fèt yo gen basès
kòm makfabrik. Yo pa akseptab ditou. Li lè pou nou sispann detwi, pou nou apwann
konstwi sou sa ki bon.
Pandan grangou vant kòde ap touye pèp la ; Pandan ensekirite ap kontinye pi rèd ;
Pandan bandi ak kidnapè ap taye banda ; Pandan popilasyon an ap viv nan kè sote ;
Pandan sitwayen ak sitwayèn pa konn anba ki Lalwa y ap fonksyone ; Pandan gen tout
pwoblèm sa yo, gen de moun k ap chache detounen atansyon popilasyon an sou kesyon
fondalnatal ki konsène avni peyi a.
Nou anba yon titèl entènasyonal san nou pa janm poze kesyon sou makfabrik seksyèl
zòt. Eske nou konn mès seksyel chèf yo voye vin komande nou pa bo isit ? Sila yo n
ap lonje kwi nou devan yo a, eske nou poze kesyon sou mès yo ? Kilè n ap fini ak
ipokrizi ? Ansasinay, machann dwòg, kadejakè, koripsyon, machanday vòt nan Lachanm,
eske sa a se pa move repitasyon ?
Gen you bon netwayaj ki merite fèt nan sosyete a tout bon vre. Men fòk nou pa twonpe
nou, ni tonbe nan konfizyon.
Peyi a nan yon kalfou difisil, sitiyasyon an malouk anpil. Li lè, li tan, pou kesyon
respè ak etik sevi kòm bousòl nan demach politik yo. Li lè, li tan, pou nou fikse
lespri nou sou peyi a toutbon vre, pou nou wè kouman n ap rive leve kokenn chenn
defi ki prezante devan nou kòm pèp, kòm peyi, kòm nasyon.
Li lè, li tan, pou nou kònen lanbi rasanbleman an. Li lè, li tan, pou tout nasyon
an, tout kategori sosyal andedan peyi a, pare yo pou fè sakrifis ki nesesè pou
retire pèp la nan malsite. Malè sènen nou toupatou, jwèt la pyeje. Veye pou dènye
bon grenn ki rete yo pa fin anfale. Fanm yo se dènye espwa peyi a. An nou pote yo
wo.
VIV YON PÈP LIB NAN YOU PEYI GRANMOUN !
Pòtoprens, 3 jiyè 2008
Pou Kolektif Solidarite Idantite ak Libète (KSIL) :
Jean William Jeanty
Maxime Magloire
Consulter +
