Ti chèz ba

Ayiti-Kriz : MINUSTAH ap simaye laterè, dapre Batay Ouvriye


dimanche 13 avril 2008

Kominike Batay Ouvriye

Dokiman sa a vin jwenn AlterPresse 13 avril 2008

Nou menm nan Batay Ouvriye, n ap leve vwa nou dènye wotè pou DENONSE ak tout fòs nou wòl MINUSTAH ap jwe nan tray pèp ayisyen ap pase pou l eseye sòti anba dominasyon gran kòmèsan ansanm ak Leta reyaksyonè ki osèvis yo.

Vreman vre, soti nan yon wòl sipozeman goumen kont gang ame pandan y ap plen pòch yo ak lajan, militè MINUSTAH yo pase nan fè REPRESYON kare bare kont manifestan k ap manifeste, nan Okay, nan Pòtoprens, kote yo maspinen manifestan, voye gaz tribò babò, bare wout manifestasyon nòmal, touye moun...

Ann apre, yo derefize pou moun reyini nan lari oswa nan katye.

Jounen jodi a, se yon veritab TERÈ y ap simaye nan katye nou yo, kote yo tire mitrayèt ale pou vini, awotè d òm, depi y ap pase, mete nou tout kouche plat atè andedan kay nou.

Apre midi a menm (12 avril), ata grenad yo voye sou popilasyon an, blese moun, touye moun, boule machandiz ti machann yo.

Gen kesyon dezame lapolis la tou. Popilasyon an temwaye sa, pòt pawòl twoup okipasyon yo di se pa vre. Anpil moun nan popilasyon an toujou kwè se vre. Kit se youn, kit se lòt, enpòtan an se "eta d espri" sa revele fas a prezans twoup l ONI yo. Se deja yon rayisman reyèl. Ki gen rezon !

Nan Batay Ouvriye, nou te toujou trè klè sou sa twoup etranjè sila yo te vin regle, kilès ak ki pwojè sosyal byen presi yo te vin defann. Se pwojè neoliberal dominasyon-lespwatasyon klas dominan yo ap chache enplante depi piplis pase 20 lane an ! Jounen jodi a, jan twoup sa yo kanpe anfas pèp ayisyen k ap batay pou nou pa mouri grangou anba benefis gran komèsan, montre nou piplis aklè toujou : FÒK Y ALE !

Aba okipasyon ! Aba okipasyon ! Aba MINUSTAH !