Pozisyon Asosiyasyon Jounalis Ayisyen (AJH)
Dokiman sa a vin jwenn AlterPresse 9 avril 2008
Asosiyasyon Jounalis Ayisyen (AJH) kondane zak agresyon ki fèt sou jounalis ak medya nan okazyon dènye evenman yo.
Jean Jacques Augustin fotograf jounal Le Matin, jounalis fotograf Blanc Markendy resevwa bal nan mouvman protestasyon ki te genyen nan jounen 8 avril-la.
Manifestan atake ak kout woch lokal Télé Haiti, lokal jounal Le Matin, Télévizyon Nasyonal Dayiti (TNH). Anpil nan atak kont medya-yo dewoule anba je lapolis ak solda nasyon zini ki sou teren- an.
Asosiyasyon Jounalis Ayisyen prezante senpati’l bay jounalis Jean Jacques Augustin ak Markendy Blanc epi swete-yo bon retablisman. AJH kondane atak kont lokal tout medya-yo ki tradwi entolerans lakay moun ki depase limit nan sosyete-a.
Pandan lap mande tout jounalis ak medya kontinye fè prèv profesyonalis ak endependans, asosiyasyon-an ankouraje konfrè laprès-yo pou pa kite gwoup oswa aktè politik manipile-yo nan pwop enterè yo, sitou nan sitiyasyon twoub ak konfizyon peyi-a ap viv aktyèlman.
Asosiyasyon jounalis ayisyen raple tout gwoup ak aktè menm jan yo gen dwa pou manifeste, yo gen devwa ak obligasyon pou proteje jounalis ak medya kap veyikile revandikasyon sa-yo sou entènet nan Radyo, nan Jounal ak sou Televizyon.
Se sèl fason,dapre asosiyasyon-an, pou’n kontinye konstwi yon sosyete ki chita sou lalwa ak respè libète laprès ak dwa pou jounalis fè travay li san menas ni presyon.
Viv yon près lib ak responsab.
Consulter +
