Dokiman sa a vin jwenn AlterPresse nan dat 22 me 2007
Ki kote Gonayiv prale ?
Aprè divès zak asasinay moun ki gen zam komèt nan twa mwa ki sot pase yo sou divès sitwayen : Edouard Johnson ,Gary, Cina Enock , Selaso, Manès ak plizyè lòt komèsan nou pa site yo, epi kounye a sou mèt Alix Joseph, direktè Radyo Pwovensyal la, lè nou gade kouman bandi ak zam kenbe vil la sou presyon, Komisyon Jistis ak Lapè, ki toujou ap travay bò kote pèp Bondye a, santi moman an rive pou l sòti nan silans pou l denonse tout vye zak sa yo.
Nou konstate, jou an jou, lavi moun ap pèdi valè li, epi sitiyasyon an ap vin pi rèd, paske otorite, ki sanse reskonsab pou pwoteje lavi, libète sitwayen ak dwa moun, pa montre yo alawotè tach yo.
Sa k pi rèd, pafwa yo parèt pami moun k ap ankouraje klima ensekirite a. Nou santi vil nou an ap depafini.
Devan tout konsta sa yo, Komisyon Jistis ak Lapè dyosèz Gonayiv la mande Gouvènman an : ki kote zafè dezameman yo t ap klewonen an ? N ap mande MINUSTAH tou : èske se kadav yo vin ede nou konte ?
N ap fè sonje yon lòt fwa ankò : lenpinite a, se yon antrav pou demokrasi tabli nan peyi a. Se li ki lakòz tout vye sitiyasyon sa a nan Site Lendepandans la.
Nou mande otorite yo pou montre yo alawotè misyon yo e nou ankouraje yo pou pran bon jan mezi pou konbat lenpinite ki lakòz ensekirite a blayi kò l, non sèlman nan Gonayiv, men sou tout rès peyi a.
Pou fini, Komisyon an eksprime senpati li ak solidarite l bay tout fanmi moun ki viktim anba enpinite a ki lakòz latroublay ak dezolasyon nan vil nou an. L ap mande popilasyon an rete solidè epi kolabore ak tout otorite pou n rive konbat tout vye fòs mal yo nan peyi n.
Nòt sa a sòti nan sekretarya Jistis ak Lapè dyozèz Gonayiv, jou lendi 21 me 2007.
Komisyon jistis ak Lapè (Jilap) nan Gonayiv
Rév. Père Marc-Edy Dessalines
Direktè
Consulter +
