Kominike Solidarite Fanm Ayisyen (SOFA)
Dokiman sa a vin jwenn AlterPresse 12 avril 2007
Solidarite Fanm Ayisyen – SOFA estomake e gen gwo tèt chage lè li aprann Jent Santral Elektoral Repiblik Dominikèn lage pèsekisyon nan kò Sonia PIERRE, sou pretèks yo vle fè kontwòl Batistè li, apre yon dirijan ekstrèm dwat Pelegrin CASTILLO te mande otorite dominikani yo pou yo mennen ankèt sou nasyonalite SONIA.
Devan sitiyasyon sa a ki sanble tèt koupe ak yon manèv diskriminasyon ak entimidasyon, n ap poze kesyon sa a yo :
• Kouman fè se nan lane 2007 la, Jent Elektoral la deside fè travay sa a, alòske Sonia PIERRE pitit Ayisyen, men ki se natif natal peyi Dominikani gen batistè li depi plis pase 40 lane menm otorite sa yo te ba li. Se sou baz sitwayèn total kapital peyi Dominikani Sonia PIERRE ap batay depi plizyè lane kòm militant MUDAH, epi ap defann dwa travayè ak travayèz ayisyen nan batey dominikani, menm jan l’ap defann dwa pèp nèg ak nègès, an Repiblik Dominikèn tankou nan divès peyi etranje…
• Kouman fè atak kont Sonia PIERRE rekòmanse nan moman Otorite Dominikèn yo anonse yo pral mennen envestigasyon sou pase 1 milyon Ayisyen ak Ayisyèn sou pretèks papye yo pa bon.
• Kouman fè tou se apre Sonia PIERRE, resevwa yon pri entènasyonal Fondasyon Kennedy ki vin bali yon rekonesans anplis nan lit l ap mennen pou defann kòz travayè ak travayèz ayisyen an Repiblik Dominikèn yo, atak sa vini.
Li parèt aklè Sonia PIERRE, akòz tout batay sa yo reprezante jodi a, yon gwo senbòl kont sistèm neyokolonyal batey la an Repiblik Dominikèn, kote batay li mete gwo enterè an danje.
Apati atak kont militant MUDAH a, sektè pwogresis an Ayiti tankou an Repiblik Dominikèn dwe rete vijilan pou konplo rasis ladwat Dominiken kont konpatriyòt Ayisyen ak Ayisyèn yo pa pase menm jan ak masak ‘’Perejil’’ la, kote an 1937 rejim diktati Raphaël Leonidas TRUJILLIO te asasinen plis pase 30 mil frè ak sè nou.
SOFA, yon lòt fwa ankò ap salye kouraj fanm vanyan sa a, l’ap ankouraje chenn solidarite tout gwoup an Dominikani tankou an Ayiti vle fè pou fòse Jent Santral Elekoral Dominikèn nan fè bak sou pèsekisyon rasis sa a kont Sonia PIERRE.
SE NAN SOLIDARITE AK VIJILANS ANT MAS YO NA RIVE KONSTWI YON LÒT IMANITE SAN DISKRIMINASYON, SAN RASIS.
MENM JAN NA RIVE KONSTWI YON LÒT KARAYIB KOTE JISTIS SOSYAL, RAPÒ EGALEGO ANT FANM AK GASON A POSIB.
NA RIVE VIV TOU, NAN YON ZILE KOTE 2 PÈP YO AP KAPAB VIV SAN MANÈV GWOUP KAPTALIS-EKSTRÈM-DWAT YO KI GEN ENTERÈ DIVIZE YO.
Pou SOFA
Carole P.P.JACOB, Kòdonatris Biwo Egzekitif
Olga BENOIT, Kòdonatris Jeneral Pwovizwa
Consulter +