Ti chèz ba

Jounen entènasyonal fanm 2007

Youn pa vle di lòt


mercredi 7 mars 2007

Tèks Martine Bruno

Dokiman sa a vin jwenn AlterPresse 7 mas 2007

Si n ta chwazi labib pou n ta kòmanse, misyon fanm sou latè se : kanpe sou kote gason. Youn la pou konplete lòt. Men fason kèk pòsyon nan bib la ekri, fè n konprann nan epòk sa a, sosyete a t ap fonksyonne miwo miba. Fanm pat sou menm liy ak gason. Menm jan ak timoun, fanm pat konte.

Egzistans limanite chita sou baz 2 sèks. Fòk youn kwaze ak lòt pou gen lavi. Poutan gen you tandans ki vle fè kwè gen youn ki pi fèb, ki vle di fanm, epi lòt la fò, se gason. Lide sa a sèvi pou fè gason domine sou fanm.

Tout moun se moun, tout moun gen dwa. Fanm dwe benefisye tout dwa ak libète menm jan ak gason. Poutan reyalite pwouve n dwa fanm toujou pase anba pye.

Fanm toujou patisipe nan tout etap limanite. Men nou ka apèn konte sou dwèt temwayaj rekonesans pou sèvis fanm rann limanite.

Nan peyi dAyiti yo renmen di : fanm pran sèt so, fanm pa janm tonbe nèt, fanm se kajou pa mal pou repare. Nap mande ki kalite reparasyon pou fanm ki pase anba kadejak ?

Youn pa vle di lòt. Fanm toujou la epi fanm pa konte. Fanm indispansab epi fanm pa valorize.

Baryè ki anpeche fanm okipe plas sou sèn politik pa yon kondanasyon. Toupatou nan mond lan fanm yo leve kanpe, pran mezi pou fè vwa fanm pase pou kat la rebat.

Jounen jodi a gen fanm ki nan pòs enpòtan, nan enstisyon entènasyonal yo tankou andan espas pouvwa plizyè peyi. Fanm prezidan, fanm nan tèt gouvènman, fanm anbasadè. Yo la tou nan domèn rechèch, nan adminisrasyon piblik kou prive. Sa pa vle di kondisyon fanm vin miyò nèt. Si kèk baryè legal kòmanse tonbe, sa mande anpil anpil enèji ankò. Miray sosyal ki chita sou mòd mantalite ki pa favorize developman fanm dwe tonbe.

Youn pa vle di lòt. 8 mas jounen intènasyonal fanm pa fèt, men pito pou yon fwa ankò, pou tout fanm sou late beni ranmase fòs yo pou relanse batay pou ranfòse imaj fanm, pou jistis sosyal ka blayi tout kote nan tout sosyete.