Kominike Platfòm Oganizasyon Ayisyen Dwa Moun (POHDH)
AlterPresse jwenn dokiman sa a 14 desanm 2006
Platfòm Oganizasyon Ayisyen Dwa Moun (POHDH) vle atire atansyon otorite yo, yon lòt fwa ankò, sou zak kidnapin, vyòl ak vòl k ap fèt anndan peyi a. Timoun, jennmoun ak granmoun ap tonbe anba bal bandi ame lajounen kou lannwit. Sa pèmèt nou wè kouman lavi moun pa gen enpòtans jodi a lakay nou kote imoralite ak zak kriminèl se sèl kòk chante.
Pami viktim nou anrejistre dènye tan sa yo, nou ka site : Farrah Dessources ki te gen ven (20) tan, Carl Roobenz Francillon ki te gen (6) zan, Lucien Duvivier ki gen swasanndis zan (70) epi 32 timoun bandi yo rive kidnape nan zòn laplèn ayè mèkredi a. Viktim yo tèlman anpil nou pa ka site tout.
Lucien Duvivier rive viktim paske li te vle anpeche bandi ale ak pitit pitit li li te vin chèche nan lekòl Sakrekè. Malgre tou, atoufè yo rive ale ak tipitit la ki gen sèlman nèf lane. Jounen jodi a, fanmi Duvivier ap kriye pou 2 rezon : Lucien kouche sou kabann lopital epi pitit pitit li anba men kidnapè yo.
Platfòm Oganizasyon Ayisyen Dwa Moun (POHDH) ap mande tout otorite yo, men sitou Prezidan René Preval ki se pi gwo majò jon nan Leta a sa li santi lè li wè moun ap tonbe chak jou nan peyi a anba bal bandi.
Platfòm Oganizasyon Ayisyen dwa moun (POHDH) ap profite okazyon an tou pou poze responsab MINUSTAH yo kesyon sa a : Kòm yo di yo vin ride nou mete lòd nan peyi a, eske lòd sa a se vyòl, vòl ak kidnapin n ap anregistre chak jou nan peyi a ?
Platfòm nan voye kondoleyans li ak senpati li bay tout moun ki gen fanmi yo ki rive blese oswa mouri anba bal atoufè. Nou voye senpati nou bay espesyalman fanmi Duvivier ki viktim de fwa.
Tankou pwovèb la di li, lè bab kanmarad ou pran dife, mete pa w alatranp ! Sitwayen ak Sitwayèn, eske n ap kite bandi pran peyi a ? Eske nou te konfye nan dat 7 fevriye 2006 avni peyi a bay nouvèl otorite yo pou nou kontinye viktim anba zak bandi ? Non ! Non ! Non ! Nou pa kwè sa !
Platfòm nan apiye tout inisyativ òganizasyon ki nan sosyete sivil la lanse pou lite kont ensekirite anndan peyi a. Nou apiye yon fason espesyal 8 jou solidarite CONAP lanse ak fanmi viktim yo epi dènye pozisyon Rezo Nasyonal Defans Dwa Moun (RNDDH) ak Komisyon Episkopal Nasyonal Jistis ak Lapè (JILAP) fè soti nan dat 6 ak 13 desannm 2006 la pou mande Leta pran responsablite l nan mete yon bout nan pwoblèm ensekirite ak kidnapin nan peyi a.
Nan sans sa a, Platfòm nan ap mande tout òganizasyon nan sosyete sivil la, tout sitwayen pou yo fè yon sèl pou leve kanpe nan kat kwen peyi a nan lide pou fòse otorite yo pran responsablite yo. Otorite yo ap montre yo pran responsablite sa a lè yo :
1) Dezame tout moun ki gen zam ilegal nan men yo,
2) Arete epi pini tout bandi ki gen men yo tranpe nan kidnapin, vyòl ak vòl,
3) Bay viktim yo bonjan jistis, reparasyon ak ankadreman.
Pou Platfòm nan, se :
COLAS Jocelyne
Sekrètè Jeneral Platfòm nan
JEAN CHARLES Jean Evrard
Sekrètè Ezekitif Platfòm nan
Consulter +