Ayiti : Platfòm nasyonal òganizasyon peyizan denonse reny enpinite ak bandi ki blayi nan peyi a

Papay (Ench, Haïti), 25 nov.06 [AlterPresse] --- Pinisyon kriminèl yo pa jwenn, piske otorite peyi a pa montre volonte pou desoutire l : se sous prensipal zak bandi ak kidnaping ki blayi toupatou sou teritwa peyi d Ayiti.

Se pozisyon Platfòm nasyonal òganizasyon peyizan ayisyen (PLANOPA) ki reyini nan 3zyèm asanble jeneral li nan lokalite Papay (Ench) nan Sant lakay Mouvman peyizan Papaya (MPP).

Plizyè dizèn delege, fanm kou gason, bay temwayaj sou divès ka vyolans yo anrejistre, nan dènye mwa sa yo, nan zòn bò lakay yo, sou 9 nan 10 depatman kote yo soti. Yo wè sitou kouman kesyon kidnaping lan gen tandans pou pran pye anpil nan vil pwovens ak seksyon kominal yo.

Delege peyizan yo dwe vote jodi samdi 25 novanm 2006 estati PLANOPA epi deside ki plan batay, espesyalman nan milye peyizan an, yo pral genyen jis nan mwa out 2009.

Finsiman mwa novanm 2006 sa a, PLANOPA ap òganize nan Papay 3zyèm asanble jeneral li, apre 2 premye yo te fè nan Papay ak nan Nip. Soti 23 pou rive 25 novanm 2006, delege peyizan yo te pase men nan pojè estati PLANOPA.

Jou samdi 25 novanm 2006 la, yo pral met deyò pozisyon PLANOPA sou sitiyasyon peyi a ap viv kounye a, sitou sou fason gouvènman jen 2006 la ap mennen bak peyi a epitou sou sa popilasyon an ta ka tann nan kad eleksyon pou majistra, KASEK ak rès kolektivite teritoryal 3 desamm yo, dapre sa ajans AltèPrès aprann.

24 novanm 2006, lavèy jounen entènasyonal kont vyolans y ap fè fanm yo sibi, nan non Kowòdinasyonal k ap plede anfavè kòz fanm yo, madan Jesi Chancy Manigat fè on brase lide sou kondisyon fanm yo ye ak sitiyasyon y ap viv jodi a nan peyi d Ayiti.

Pou samdi 25 novanm 2006 la, asanble jeneral PLANOPA a ap akeyi Bernard Etheart, direktè jeneral Enstiti nasyonal refòm agrè (INARA), ki pral fè on rale sou refòm agrè. INARA ekziste depi 1995.

An novanm 2006, Platfòm nasyonal òganizasyon peyizan ayisyen, ki gen estrikti nan komin ak nan depatman yo, gen 221 òganizasyon manm ou jwenn nan 97 komin nan 9 sou 10 depatman peyi a, esepte zòn Grandans (Jeremi) nan sidwès peyi a. Se sèlman òganizasyon, grenn moun pa ladan, ki ka vin manm PLANOPA. [rc apr 25/11/2006 10 :00]