GARR mande sispann rapatriye Ayisyen nan move kondisyon, soti nan Dominikani

Kominike Gwoup k ap Apiye Rapatriye ak Refijye yo (GARR)

Dokiman sa a vin jwenn AlterPresse nan dat 26 septanm 2006

Gwoup k ap Apiye Rapatriye ak Refijye yo(GARR), aprann avèk anpil tristès kijan yon gwoup ayisyen, otorite dominikèn yo t ap rapatriye nan apremidi 25 septanm 2006, viktim nan yon tèrib aksidan machin. Aksidan sa a rive bò 5è apremidi konsa, toupre antre vil Elias Pinya, nan moman kote machin ki t ap transpòte moun sa yo te pèdà­ fren epi al ateri nan Rivyè Cana.

Yon pati nan blese yo twouve yo kounye a nan lopital San Juan de la Maguana ak nan Elias Pinas. Gen yon lòt pati, apre yo te fin ba yo premye swen, yo te lage yo san prezans okenn otorite ayisyèn, bò fwontyè a. Komite Dwa Moun Bèladè a te blije fè anpil monte desann pou al ranmase blese yo ki t ap rive ak tout rad plen san sou yo, kèk nan yo pye kase, bra kase.

Dapre tout enfòmasyon GARR ranmase, yo te anviwon 90 ayisyen konsa ki te nan yon machin akonpaye ak 2 militè plis 5 ajan migrasyon. Nouvèl ki parèt nan laprès fè konnen, machin migrasyon an pa t nan kondisyon pou fè yon gwo vwayaj long konsa, chaje ak moun. Sanble fren li pa te bon.

Viktim nan aksidan sa a, se moun ki soti plizyè kote an Ayiti: Wanament, Okap, Jakmèl eksetera. Otorite dominikèn yo te ranmase yo plizyè kote sou teritwa dominiken an. Anpil ladan yo t ap travay nan jaden ak nan konstriksyon.

Pou kounye a, GARR poko gen non moun ki viktim nan aksidan sa a. Otorite dominikèn yo pa bay non yo, alòske, dapre pwotokòl 1999 la 2 Leta yo siyen, anvan yo fè yon rapatriman, yo sipoze gen lis non moun yo, epi voye yo davans bay otorite ayisyèn yo.

Aksidan sa a vin mete devan je tout moun, yon lòt fwa ankò, nan ki kondisyon degradan Repiblik Dominikèn ap fè rapatriman yo, san okenn respè pou moun, san okenn sekirite pou rapatriye yo. N ap raple, se pa premye aksidan konsa ki fèt kote machin k ap bwote ayisyen pil sou pil fè aksidan an Repiblik Dominikèn.

GARR lanse yon apèl prese prese bay otorite ayisyèn yo pou pote sekou bay moun ki twouve yo lopital toujou, ak sila yo k ap kontinye rive nan fwontyè a tou blese, e ki pa an kondisyon pou kontinye ale lakay yo byen lwen. L ap pwofite, yon lòt fwa ankò, mande otorite yo pou fè tout sa yo kapab pou kalite rapatriman sa yo sispann.

Pòtoprens 26 septanm 2006

Colette Lespinasse
Kowòdonatris