Haiti
Atik

Ayiti - Rep. Dominikèn : Dominiken fèmen fontyè Malpaso a


Ekri jou lendi 14 out 2006

Pòtoprens, 14 dawou [AlterPresse] --- Bo 2 è apremid lendi 14 dawou 2006 la, Otorite dominiken deside fèmen fontyè Malpaso apre afontman ak zam ki te genyen ant moun Fon Parizyen ak ajan CIMO, dapre sa ajans sou entènet AltèPrès aprann.

“piske gouvenman ayisyen pa ka mete lòd sou bò pal, nou deside fèmen pati pa nou a†Se sa kèk otorite dominiken ta di, dapre sa ti komèsan ayisyen k ap feraye sou fontyè Malpas malpaso fè nou konnen.

Vè 3 è apremidi lendi 14 dawou a, pa t gen enfomasyon ki presize gen moun ki ta viktim nan deblozay yo ant moun Fon Parizyen, seksyon kominal Gantye, ak ajan CIMO.

Dapre sa nou aprann, tansyon an te monte wo jodi lendi 14 dawou apre nouvel arestasyon yon komesan ayisyen ki te soti Potoprens.

Arestasyon lapolis ta fè sou komesan Arnel Louis ta lakoz moun Fon Parizyen move kou kong. Se konsa yo voye kout woch ak moso boutèy sou polisye ki t ap akonpaye direktè ladwann Malpas la Jeantal Clervil.

Tout aktivite paralize pou kounye a nan Fon Parizyen, machin pa monte ni desann, se kout woch pasi pala, dapre sa on responsab dwa moun deklare bay ajans AltePrès.

Mitan mwa dawou 2006 sa a fè 36 jou depi chofè kamyon ayisyen ki fè Potoprens Santo Domingo tanmen on grèv pou mande revokasyon direktè ladwann malpas la Jantal Clervil. Sanble gen nan moun k ap mande demisyon Clervil la ki ta vle jwenn pos nan biwo leta yo, dapre nouvèl k ap sikile nan Fon parizyen.

Anplis moun ki pa ka vwayaje, machandiz ki pa pase, Menm rapatriye yo viktim nan mouvman grev sa a. Gen chofe taksi moto ki rive mande jiska 250 goud pou mennen on moun sou fontye a.

Gen komesan ayisyen ki te akize chofè k ap fè grèv yo deske se ta moun k ap ankouraje kontrebann sou fontye a.

Depi grev la koumanse, gen moun Fon Parizyen ki te fose moun ki t ap vwayaje peye anpil lajan pou yo rive pase.

On lòt bo, nou aprann, nan dat 10 out 2006 ki sot pase a, yon santèn moun te manifeste nan Beladè pou ekzije patisipasyon pa yo andedan biwo leta lokal yo.

Manifestan yo te eseye femen pot kek biwo leta nan zon nan. Yo te rive menm frape atè on polisye ayisyen ki te arete youn nan yo.

Sitiyasyon sa a ekziste nan Beladè depi otorite yo deside lonmen on lot direktè nan ladwann Beladè. [do rc apr 14/08/2006 14 :45]