Pòtoprens, 21 avril 06 [AlterPresse] --- Yon moun mouri anba bal, kèk lòt blese anba bal nan latibonit, epi lapolis nasyonal fè plizyè arestasyon : se bilan jounen eleksyon pou senatè ak depite, kote yon ti kras moun t al vote sou tout teritwa a, dapre enfòmasyon ajans an liy AltèPrès ranmase.
Se sèlman 20 sou chak 100 moun ki vote nan eleksyon pou senatè ak depite jounen 21 avril 2006 la an Ayiti, dapre Johan Van Hecke ki se chèf misyon obsèvasyon Inyon peyi Ewòp yo.
Van Hecke kwè moun ki nan laj pou vote yo pa t motive ase pou eleksyon sa yo. Se yopun nan rezon ki ta esplike yo p ap soti anpil anpil pou al jete bilten pou senatè ak depite. Pou limenm, tout pati politik yo, Konsèy Elektoral Provizwa a (KEP a) ak anpil lòt sektè nan sosyete Ayisyèn nan gen moso responsabilite, yo chak, nan sa k pase a.
Menm lè li rekonèt te gen kèk bagay kochi nan operasyon vòt yo, depite ewopeyen an deklare gen yon gwo pa ki fèt nan sa ki arevwa ak òganizasyon vòt lan ki te parèt pi kòdyòm pase premye tou 7 fevriye 2006 la.
Nan finisman jounen 21 avril la, enfòmasyon ki vin jwenn ajans AltèPrès fè konnen gen yon moun ki mouri anba bal nan Grann Salin, nan depatman latibonit, alòske plizyè lòt blese nan menm depatman an ak lòt kote, san nou pa bliye divès arestasyon lapolis nasyonal fè, pami yo moun ki t ap eseye fè koken pou kandida. [lm rc apr 21/04/2006 18 :00]
Consulter +
