Pòtoprens, 11 avril 06 [AlterPresse] --- Gouvènman meriken an bay ekip tranzisyon peyi d Ayiti move nòt nan sa ki gen awè ak kesyon dwa moun andedan peyi a, depi mas 2004 lè chèf Lavalas la, Jean-Bertrand Aristide, te fin kite pouvwa a.
Gouvènman meriken an di reny enpinite a gaye rèd mare, tankou se yon lwa ki chita toupatou pou moun pa sibi pinisyon yo merite pou zak yo komèt.
Nan yon rapò li mete deyò sou sitiyasyon dwa moun nan peyi d Ayiti pou ane 2005-2006, gouvènman George Bush la di maspinay dwa fanm, trafik timoun ak prizonye k ap kanni nan prizon san jijman fè kenken nan peyi a.
Polisye pa sispann pase dwa moun anba pye, detan jij kowonpi ap vann jistis pa ti kiyè adwat agòch.
Rapò blan meriken an fè konnen polisye ayisyen yo touye anpil moun san yo pa jije yo, peyi d Ayiti tounen yon savann kote kidnapè ap paweze, koripsyon ap taye banda nan tout bwat leta yo, gen trafikan k ap vann timoun pa bann ak pa pakèt, alòske gouvènman (Gerard Latortue ap dirije a) pa fè anyen pou fè fas kare ak tout pwoblèm sa yo k ap bwase bil peyi a.
Devan sitiyasyon sa a, gouvènman Bush la rele anmwe pandan li fè chonje tout pwojè li bay bourad lajan, nan peyi d Ayiti, pou pèmèt pèp ayisyen an jwenn yon kalman ak pwoblèm lavichè, ensekirite ak zak bandi.
Etazini di li te bay 31 milyon dola ameriken (biyè vèt) pou òganize eleksyon ki te fèt 7 fevriye 2006 la. Tou sa, se te pou ede tabli bon jan demokrasi nan peyi d Ayiti.
Rapò blan meriken an sòti, nan moman gouvènman pou yon ti bout tan ap frape lestonmak li nan enstale Konsèy siperyè pouvwa jidisyè jou ki te 10 avril 2006 la nan lekòl Majistrati peyi d Ayiti.
Gwo palto nan kò diplomatik la pat mete pwent pye nan seremoni sa a, ki te te fèt sèlman an prezans anbasadè alman an Hubertus Thoma. Anbasadè meriken, kanadyen ak franse, ki toujou plede pou yon pase men nan aparèy jistis la, pa t la.
Manm konsèy la te sèmante sou konstitisyon an, pa t gen lòt zotobre ki te fè deplasman.
Militan dwa moun, Pierre Espérance, ki se direktè Rezo nasyonal k ap defann dwa moun (RNDDH), di li estomake lè l wè Konsèy la enstale tankou yon boutèy vid. Esperance leve lavwa tou, dèske li wè komisè gouvènman Kap Ayisyen an, Mèt Rockefeller Vincent, ap patisipe kòm manm konsèy siperyè Lajistis la, alòske se yon zotobre ki gen anpil akizasyon sou do l, kòmkwa li ta gen men l tranpe nan lage kidnapè, bandi ak dechèpiyè nan vil Okap.
Move nòt sa a, ekip tranzisyon an pran anba men blan meriken an, rejwenn konsta RNDDH te fè nan mwa fevriye 2006 la, kote l te di gouvènman Latortue pa pèmèt dwa moun respekte nan peyi d Ayiti. [do rc apr 11/04/2006 17:00]
Consulter +
