Ayiti : Pozisyon Radyo Kiskeya sou yon ensidan kote kontab li enplike epi ki lakòz yon lanmò nan Kafoufèy

Nòt pou laprès Rayo Kiskeya

Dokiman sa a vin jwenn AlterPresse 13 mas 2006

Direksyon ansanm ak tout ekip Radyo KISKEYA aprann ak kè sere lanmò yon sitwayen ayisyen moun konnen sou non Abeille DESARDROUIN nan aswè vandredi 10 mas 2006 la nan Avni Muller (Kafou Fèy), nan kad yon ensidan ki enplike Kontab radyo a, M. Nissage ST-JOY

Nouvèl sa a frape ekip KISKEYA a anpil akòz, depi radyo a kanpe, youn nan pi gwo objektif li se defann lavi ak tout kalte libète, nan dyalòg, tolerans ak lespri tèt ansanm, nan tout sikonstans ak sitirasyon.

Lapenn nou fò tou, lè nou konnen, depi 12 lane radyo a egziste, Direksyon an ak tout ekip li, nan kolaborasyon ak Kontab ST-JOY, toujou benefisye kalite li, tankou : seryozite, sans responsablite, fidelite, amitye ak koutwazi.

Direksyon ansanm ak tout ekip Radyo KISKEYA a, regrèt anpil ensidan vandredi 10 mas la e yo voye kondoleyans ki sot nan fon kè yo bay paran ak pwòch viktim lan. Yo swete tou pou tout fanmi ST-JOY a gen kouraj ki nesesè nan moman difisil sa a.

Pou sa ki rive apre ensidan an, Direksyon ak ekip radyo a ap pwofite swete pou peyi a rive nan moman kote, pou rezoud tout kalte pwoblèm, se enstitisyon kap sèl kòk chante.

Konsa, se lajistis ki gen misyon di sa ki te pase reyèlteman nan Avni Muller nan aswè vandredi 10 mas la e se ankò lajistis ki gen pou deside sou dosye a, nan respè dwa chak pati ki konsène genyen pou defann pozisyon yo kòm sa dwa.

Pòtoprens, samdi 11 mas 2006

Sonny Bastien PDG Radyo KISKEYA