Pòtoprens, 7 fev. 06 [Alterpresse] --- Operasyon vòt yo koumanse maten 7 fevriye 2006 la avèk anpil difikilte sou tout teritwa peyi d Ayiti, nan sa ki arevwa ak òganizasyon vòt la epitou nan sa ki regade kesyon teknik yo, dapre sa ajans Altèprès konstate.
« Nou vle eleksyon, nou pa vle seleksyon, nou pa vle vyolans. Nou gen kat nan men nou, men nou poko ka vote. Magouy sa a p ap pase, fòk nou jwenn kote pou nou vote†, dapre sa kèk moun ki t ap mande biwo vòt deklare nan yon manifestasyon.
Responsab biwo vòt yo rive nan sant yo trè ta, alòske plizyè milye fanm ak gason ap tann depi gran bonè nan maten pou vote.
1 moun mouri toufe nan Dèlma, anba yon kriz tansyon. Gen anpil moun ki pèdi konesans akoz sitiyasyon moun kole ak lòt devan biwo vòt yo. Lapolis nasyonal menm voye gaz lakimojèn pou kontwole foul moun ki anvi vote kare bare.
Kesyon ret tann anpil nan liy yo pouse kèk fanm ak gason pral lari branch bwa nan men sou Dèlma, toupre biwo santral Konsèy Elektoral Pwovizwa a (KEP a) pou leve lavwa epi pou ekzije biwo pou yo kapab vote. Sa pa anpeche anpil lòt moun toujou rete kanpe an ran, nan menm blòk Dèlma a, toupre kafou wout aryopò entènasyonal la, pou kapab antre nan biwo Ofis Nasyonal Asirans Granmoun nan (ONA).
Nan koumanmsman jounen an, jounalis pa t wè okenn gid elektoral, jan KEP a te pwomèt sa. Malgre tou, vòt lan rive koumanse kanmenm nan divès biwo.
Nan Jakmèl, gen manm biwo vòt ki mande moun yo fòk yo ta mache ak ni kat electoral la ni fich yo te al pran kat la. Max Mathurin, prezidan konsèy elektoral la, di sa pa dwe fèt, paske se sèlman kat la ki pou otorize moun yo vote.
Nan koumansman jounen an, yon foul moun t ap mache apye pou al chèche biwo vòt. Pa t gen anpil machin transpò piblik ki t ap fè virewon nan divès sikui nan kapital la.
Toupatou kote repòtè Ajans AltèPrès yo vizite, anpil moun t ap tann nan liy pou vote.
Devan pwoblèm ak tèt chaje ki parèt yo, KEP a deside mete sou pye yon komite ijans pou gade ki jan yo ka pote solisyon.
Tout moun, ki va twouve yo nan ran a 4 è apremidi devan biwo yo, ap kapab ranpli devwa yo kòm sitwayen, yo p ap fèmen biwo vòt yo sou yo, dapre sa KEP a fè chonje. [rc lm apr 7/2/2006 11:00]
Consulter +