Ayiti - Vyolans : Fanm Yo La mande sistèm jidisyè a “aplike lalwa kòmsadwa” apre patnè Ginoue Mondésir fin touye li

Kominike òganizasyon Fanm Yo La

Dokiman sa a vin jwenn AlterPresse 28 desanm 2005

FANM YO LA sou gwo chok aprè li fin apran asasinay Valdo JEAN te fè sou Ginoue MONDESIR prezantatris vedèt emisyon videomax nan chèn 5 jou samdi 24 desanm pase a.

Nouvèl sa tonbe kèk jou aprè chantè yo rele Mastè Bèd la te fè kadejak sou yon jèn minè nan katye lakay li.

FANM YO LA ap prezante kondoleyans li bay pitit gason Ginoue an, Fanmi li, Telemax, fanatik li yo epi ak mond kiltirel ayisyen an. Zak sasinay sa montre yon lòt fwa ankò mòd kalite vyolans fanm ap sibi nan sosyete a kit se nan kay, oubyen nan lari kote yo vle fè nou kwè gason gen dwa bat, maltrete epi touye fanm jan l vle, san kè sote.

FANM YO LA ak lòt Oganizasyon feminis yo pap janm sispann denonse, kondane epi kontinye travay pou elimine tout kalite violans kap fèt sou fanm nan peyi Dayiti.

FANM YO LA ap raple denye dispozisyon legal, Ministè Kondisyon Fanm te fè gouvènman an adobte nan dat 6 jiyè 2005 e ki te pibliye nan jounal le Monitè nan dat 11 out 2005 kote yo te modifye rejim agresyon seksyèl yo, yon fason pou yo te elimine diskriminasyon seksyèl kont fanm nan kòd penal la. Kidonk ni kadejak, ni sasinay sou fanm, se krim yo ye e moun ki fè yo kapab rete nan prison tout vi yo. Se sa la lwa di jounenn jodia. Nan sans sa FANM YO LA mande pou sistèm jidisyè a pran responsabilite-l nan aplike la lwa kont asasen Ginoue MONDESIR an.

Pòtoprens, 26 desanm 2005

Lisa FRANCOIS
Directrice Exécutive