Kominike ministè kondisyon fanm ak dwa fanm
AlterPresse resevwa dokiman sa a 27 desanm 2005
Apre yon chantè ayisyen fin fè kadejak sou yon jenn fi 17 lane nan Dèlma 65 jou ki te 15 desanm ki sot pase a, Ministè Kondisyon Fanm ak Dwa Fanm aprann nouvèl lanmò trajik Ginoue Mondésir, prezantatris vedèt emisyon Videomax sou Telemax. Ministè Kondisyon Fanm ak Dwa Fanm prezante kondoleyans li bay pitit li, paran l, zanmi l, kolèg li nan Ministè Afè Etranjè ak chèn Televizyon Telemax.
Zak sa a se youn pami plizyè lòt ki fèt chak jou nan peyi a ki dwe fè tout moun konprann fòk sosyete a konbat mantalite ki fè kwè fanm se byen prive mari l oubyen mennaj li ki ka fè sa l vle avè l.
Pandan Ministè a kondane krim sa yo, li fè tout moun sonje gen yon dekrè gouvènman an pran ki te pibliye nan jounal ofisyèl peyi a « Le Moniteur » nan dat 11 out ki sot pase a e ki pini agresyon seksyèl ak vyolans sou fanm kote agresè a kapab peye zak sa a menm pandan tout lavi li swivan ka a. Dekrè sa a elimine tou atik 269 kòd penal la ki te pèmèt lajistis padone yon mari ki touye madanm li pou kòz jalouzi. Popilasyon an pa dwe bliye non plis konvansyon Belèm do Para, yon konvansyon ki sanksyone vyolans sou fanm, Ayiti ratifye nan lane 1996.
Ministè Kondisyon Fanm ak Dwa Fanm ap mande aparèy jidisyè a yon lòt fwa ankò pran responsablite l pou pini tout fòm vyolans sou fanm nan sosyete a. Fòk lalwa aplike kont agresè yo, sa ki pral ede chanje mantalite ak konpòtman vyolan moun genyen nan sosyete a. Fòk zak vyolans yo sispann sou moun espesyalman sou fanm, pou yon sosyete ki chita sou respè dwa moun.
27 desanm 2005
Ministè Kondisyon Fanm ak Dwa Fanm
Consulter +