Paris, 28 nov. 05 [AlterPresse] --- 2 mwa aprè koumansman seri zak vyolans ki te fèt nan katye difisil yo an Frans, reskonsab yo ap chache kilès ak kisa ki reskonsab.
Nan koumansman vyolans yo, chay la te tonbe sou do imigre yo, sitou sa yo ki sòti nan peyi Afrik yo. Aprè sa, sèten otorite fransè di se poligami -zafè gason ki gen anpil fanm- ki lakòz vyolans yo. Koulye a, se sou do mizik Rap yo vle lage chay la.
Daprè premye minis Dominique de Villepin, se pa mizik Rap ki reskonsab kriz ki te sakaje katye difisil yo an Frans semèn ki sot pase yo. Men se pa pozisyon 200 palmantè fransè,152 depite ak 49 senatè, ki gen nan tèt yo depite François Grosdidier, ki se manm UMP -pati ki sou pouvwa a. Yo mande minis jistis la, Pascal Clément, pou li anvizaje pouswit kont plizyè gwoup ak chantè Rap akòz mesaj rayiman ak rasis ki ap sikile nan mizik yo.
Palmantè yo lonje dwèt sou 7 gwoup ak chantè rap. Se Mesye R, ki rele Richard Makela, Smala, yon chantè, Fabe ak Salif, 2 rapè, gwoup Lunatic, gwoup 113 ak gwoup Ministè Amè. Nan ministè Amè ou jwenn kèk rapè tankou Passi, Bugsy ak Doc Gyneco.
Daprè Mouvman kont Rasis ak pou zanmitay nan mitan pèp yo (MRAP) aprè imigre, poligami (zafè gason ki gen anpil madanm) se mizik rap yo vle bay pote chay vyolans semèn pase yo an Frans.
Jounalis Olivier Cachin, espesyalis Hip-Hop, menm di li lis la fè li sezi paske gwoup Lunatic kraze depi an 2002, Ministè Amè pa mete on albòm deyò depi 1995 alòske Fabe sispann fè rap depi 1998.
Mouvman rap la, nou ap raple, pran nesans nan lane 1970 yo Ozetazini. Se on estil mizik ki gen rasin li nan katye difisil yo, sitou nan mitan popilasyon nwè yo ki itilize gwo mo pou dekri move lavi ki genyen nan geto yo.
Antouka an Frans, sa pa gen lontan, yo te pran labitid lonje dwèt sou on seri gwo atis tankou Georges Brassens, Léo Ferré, Jacques Brel kòm atis ki ap fè pase move mesaj nan mitan jèn yo. [wa apr 28/11/2005 12:20]
Consulter +