Nòt pou laprès Sant Pon Ayiti
AlterPresse resevwa dokiman sa a 22 novanm 2005
Sant Pon Ayiti konsidere depa definitif Pè Pedro Ruquoy pou peyi Beljik kòm yon kou di pou relasyon ant pèp Ayisyen ak Pèp Dominiken an.
Nou kwè absans li pral gen plis enpak ankò sou Aysisyen kap viv nan Batèy ki nan Barawona yo, ki pral viktim pi plis anba men Militè Dominiken ak Pwopriyetè Izin Santral Barawona.
Sant Pon Ayiti sezi wè kòman otorite nan legliz katolik nan Repiblik Dominiken abandone pè Pedro ki oblije kite travay li akoz menas pwopriyetè Izin Sik nan Barawona ap fè sou lavi l.
Depa defansè Ayisyen sa a, nan lit pou respè dwa Ayisyen yo, se yon mesaj klè kont tout moun ak òganizasyon kap defann dwa moun ak dwa Ayisyen yo an Repiblik Dominiken. Sant Pon Ayiti avèti gouvènman an ak popilasyon Ayisyen an nan mwa kap vini la yo pral gen anpil Ayisyen yo pral voye tounen ann Ayiti, maltrete yo oubyen touye yo.
Nou mande pou Gouvènman Ayisyen an kreye yon estabilite andan peyi a epi kreye bon jan kondisyon pou tout Ayisyen rete viv nan peyi Dayiti, pandan l dwe pwoteje dwa lòt Ayisyen ki nan peyi etranje, espesyalman sa ki nan Repiblik Dominiken yo.
Nap raple Pè pedro Ruquoy kite Repiblik Dominiken 17 novanm 2005 lan, aprè l te fin pase 30 lane ap travay pou yon chanjman, nan lavi migran Ayisyen kap viv nan Repiblik Dominikèn yo. Sant Pon Ayiti ak Gwoup pou Apiye Rapatriye ak Refije yo GARR louvri yon lis siyati pou moun ki enterese rann li yon omaj li merite.
Pou siyen l, pase nan GARR, 13 1ere ruelle rivière
ak nan lokal SANT PON AYITI, 33, AV Charles Summer
Pòtoprens, 22 novanm 2005
Brigitte Canois
Administratris Sant Pon Ayiti
Consulter +
