Pozisyon Kolektif Mobilizasyon Kont Lavichè
Nòt sa a vin jwenn AlterPresse 8 novanm 2005
Kolektif Mobilizasyon Kont Lavichè kontan aprann gouvènman Venezyelyen an ap
voye yon delegasyon konpayi petwòl PDVSA vin negosye ak Leta Ayisyen sou
avantaj yo deside bay Ayiti nan zafè gaz. Malgre gouvènman Ayisyen an toujou montre
l pentad sou dosye sa a, gouvènman Venezyelyen an montre li gen anpil volonte
pou bay Ayiti anpil avantaj nan pèmèt li jwenn gaz nan pri ki pi ba pase pri
ki sou mache a. Anplis sa, gouvènman Venezyelyen an deside ede Ayiti menm nan
frè traspò. Sa vle di, si akò sa a siyen, popilasyon an ap gen posiblite rale
yon souf anba pri gaz ak pri transpò nan peyi a. Kidonk, se yon okazyon Ayiti
pa dwe rate.
Sepandan, malgre Ayiti gen gwo enterè pou li ta fè yon bonjan negosyasyon ak
Venezyela, nou aprann gouvènman Ayisyen an ap prepare l pou li fè dilatwa nan
negosyasyon yo. Kòm gouvènman an paka di non, li ta sanble ap pare pou jwe kat
dilatwa. Kolektif Mobilizasyon Kont Lavichè ap denonse ak tout fòs li mannèv
dilatwa k ap pare pou fèt yo.
Kolektif la ap denonse tou yon pati nan sektè prive a k ap pare pou se yo ki
benefisye avantaj Venezyela ap bay Ayiti nan ka negosyasyon yo ta rive bout.
Kolektif la kwè, apati negosyasyon k ap fèt yo, dosye gaz la dwe jere yon lòt
jan. Nan plas sektè prive a, se popilasyon an sitou mas popilè yo ki dwe
benefisye avantaj Venezyela ap pare pou li bay Ayiti yo. PDVSA se yon konpayi Leta,
kidonk, negosyasyon yo dwe fèt ant Leta Venezyelyen ak Leta Ayisyen. Nan sans
sa a, se popilasyon an anpriyorite ki dwe benefisye avantaj yo. Pou sa fèt,
fòk se Leta ki pou jere kesyon gaz la nan plas sektè prive a ki limenm wè
benefis li sèlman.
Kolektif la kwè tou, negosyasyon yo dwe dewoule nan bonjan trasparans.
Kidonk, gouvènman Ayisyen an dwe bay popilasyon an bonjan enfòmasyon sou chak pa ki
fèt nan negosyasyon yo. Gouvènman an dwe rann piblik dokiman akò ki dwe soti
nan negosyasyon yo, yon fason pou tout peyi a konnen kisa ki nan akò sa a. Nan
sans sa a, pou ganranti enterè popilasyon an, mas yo anpatikilye nan
negosyasyon yo, Kolektif Mobilizasyon Kont Lavichè pare pou li patisipe nan
negosyasyon yo. Nan moman enpòtan sa a, Kolektif la mande popilasyon an pou li rete
veyatif kont tout kout ba ak mannèv dilatwa ki kapab fèt nan negosyasyon yo.
Pandan n ap veye, nou dwe rete mobilize pou kontinye fòse gouvènman mache nan sans
enterè mas yo olye li defann enterè FMI ak Bank Mondyal.
Pèp ki wè klè pa reve je klè
Ann rete mobilize pou defann dwa nou
Pou Kolektif la :
Wilson Jean Junior
Yves Barthélemy
Guy Numa
Kontak : Kolektifmkl@yahoo.fr
Consulter +
