Pòtop., 29 out 05 [AlterPresse] --- Plizyè dizèn milye moun te rasanble dimanch 28 out nan aswè sou Chanmas, nan Pòtoprens, pou amize yo nan yon festival konpa.
Festival sila ki te fèt nan kad selebrasyon 50tan depi mizik popilè sa a
ekziste. Li te reyini tout gwoup potomitan konpa a ki an Ayiti ak aletranje.
Pami gwoup ki aletranje yo ki te prezan, nou te jwenn Tabou Combo, Nu Look,
Carimi, Magnum Band ak Zenglen.
Pami gwoup kap feraye an Ayiti yo ki te la, nou te jwenn Twopikana, Mizik
Mizik, Kdans, Mamina, Kreyòl la, Mas Konpa ak Dega.
Kidonk se te yon kokenn chenn evenman ki te rasanble gwoup divès jenerasyon
ak estil ki depaman; sa ki te mete plis piman nan anbyans lan pou latriye
patisipan yo.
Festival konpa sa a te dwe derape depi bò midi. Men se jis bò 5kè apremidi
li te koumanse. Sa ki mete yon ti kras presyon sou divès gwoup ki pat gen
tan jwe.
Se Tabou Konbo, youn nan gwoup konpa ayisyen yo pi konnen aletranje, ki te
fèmen koudyay la bò minwi konsa.
Prezidans lan ak gouvènman ayisyen te onore nan okazyon an plizyè atis ki te
resevwa plak onè ak merit.
Yon lòt bò, reprezantan gouvènman an te li nan okazyon an yon arete
prezidansyèl ki deklare 28 out jou konpa ak jou Nemours Jean Baptiste, papa
mizik popilè sa a.
Moun te ka konstate yon gwo dispozitif sekirite nan tout zòn ki viwonnen
Chanmas yo. Se MINISTA ak Lapolis nasyonal ki tap bay sekirite.
Se yon pwodiktè prive Joubert Charles ak Frantz Duval, direktè magazin
kiltirèl Tikè ki te pran inisyativ òganize festival konpa sa a. Aktivite sa
a te resevwa bourad konpayi Kòmilfo, Kòmsèl ak Wòm Babankou. [vs apr 29/08/05 10:00]
Consulter +
