Pòtoprens, 13 nov. 2024 [AlterPresse] --- Sitiyasyon an rèd nèt nan plizyè katye Pòtoprens, kote bandi ak zam ogmante tansyon an, ak gwo kout zam y ap tire ak zak dechèpiyay ak briganday y ap miltipliye, dapre temwayay ki vin jwenn AlterPresse ak AlterRadio.
Popilasyon Pernier, yon lokalite nan Petyonvil (nan lès kapital) lanse kout rèl anmwe maten 13 novanm 2024 la. Yo fè konnen presyon bandi yo monte disèt wotè.
Yo di gwoup bandi deplwaye rive nan pa pòt Akademi polis la. Y ap tire lannuit kou lajounen nan tout perimèt la. Y ap touye, blese, antre nan kay, piye, boule.
Temwen yo pa anmezi bay detay. Yo sèlman fè konnen plizyè fanmi ap deplase depi kèk jou pou cheche abrite yo, e bandi suiv yo jis nan abri yo.
Rès popilasyon ki sou plas la rete an otaj depi plizyè jou. Pèsonn pa kab mete pwent pye yo deyò pandan malfra yo okipe lari yo.
Temwayaj yo pa pale sou ankenn mouvman lapolis, pandan popilasyon Pernier ap peri, menm jan ak plizyè lòt kote.
Tablo a pa diferan nan plizyè katye Taba, ki vwazen Pernier. Anbasad ameriken soti yon nòt maten 13 novanm 2024 la sou rezo sosyal yo pou fè konnen aktivite anbasad la limite, akòz vyolans ki ogmante nan zòn nan.
Dapre anbasad la, pa gen pèsonn moun ki konnen kouman sitiyasyon sekirite a pral ye nan peyi d Ayiti, kote sitiyasyon an danjere.
Nan yon nòt li rann piblik nan dat 12 novanm 2024 la, Konsèy prezidan pou tranzisyon an (Kpt) kondane vyolans ki ogmante nan zòn metwopolitèn nan. Li mande popilasyon rete vijilan epi kolabore ak fòs lòd yo.
An jeneral, jounalis pa konstate prezans lapolis nan divès zòn maten 13 novanm 2024 la. Sa ki lakòz gwo laperèz.
Kèk kote tankou Solino, nan sant vil Pòtoprens la, bandi yo kontinye boule anpil kay nan figi Lapolis. Yo pran plis teritwa.
Yo touye plizyè jèn, ki t ap fè rezistans dèyè Barikad. Anpil moun nan zòn Solino ak Nazon te oblije kite lakay yo madi swa 12 novanm nan anba bal bandi. Tout maten 13 novanm nan, gen moun kap kite zòn nan.
Yo rapòte plizyè ka lanmò anba bal nan dènye 24èd tan yo nan zòn metwopoliten Pòtoprens la. AlterPresse pa anmezi verifye enfòmasyon sa yo. [apr 13/11/2024 10:00]
Foto : Nasyonzini
Consulter +
