Pòtoprens, 24 oktòb 2024 [AlterPresse] --- Pa gen kouran nan plizyè katye zòn metwopoliten Pòtoprens lan, akoz yon pán depi 2 jou nan santral kouran Pelig la, depatman Plato santral. Se avètisman konpayi leta Elektrisite d Ayiti, ki pwomèt teknisyen konpayi an ap travay pou regle pán nan pi vit posib.
Se plizyè dizèn bandi ki tonbe nan lokalite Bèsi, Viyen, Toma, nan boukantay kout zam ak lapolis nasyonal la, ki te jwenn sipò popilasyon Akayè a, madi 22 oktòb 2024 la, lè bandi ak akolit yo t ap eseye anvayi komin nan ankò. Se temwayáy ki vin jwen AlterPresse ak AlterRadio (Son yon moun Akayè, ki viv tribilasyon sa yo.
Mèkredi 23 oktòb 2024 la, lapolis nasyonal la te pale de plis pase 15 bandi, ki tonbe nan boukantay kout zam ak ajan yo nan Akayè, sou wout nasyonal nimewo 1 an, ki nan yon distans 40 kilomèt konsa parapò ak Pòtoprens. Lapolis nasyonal la di l ranfòse prezans li nan Akayè, pou kwape bandi ak zam ki ta vle al simen laterè nan komin nan.
Bandi ak zam yo te konprann se jwèt, lè otorite yo t ap di yo depose zam yo. Se pinga fòs miltinasyonal la, ki deklare li deside pote kole kare bare, nètalkole, ak lapolis nasyonal d Ayiti a, pou kwape zak laterè gang ak zam yo sou teren an.
Nan travay tèt ansanm sa a, gen anpil manm gang ki blese nan kondisyon, ki ka mete lavi yo an danje nan depatman Latibonit lan. Menm operasyon lendi 21 oktòb 2024 la pèmèt yo rive arete plizyè dizèn manm gang nan Latibonit, espesyalman nan Kafou Pèy, pa twò lwen Pon Sonde. Nan Patchwal, pa twò lwen Pon Sonde, yo sezi plizyè zam ak lòt materyèl nan men bandi yo. Se sa fòs miltinasyonal la fè konnen nan yon nòt, ki pote dat 24 oktòb 2024.
Èske Konsèy prezidan pou tranzisyon an ak gouvènman an ta nan plan kriminèl pou fini ak popilasyon an, jan nou wè popilasyon depatman Lwès ak Latibonit yo poko janm ka rale yon souf anba laterè gang ak zam yo ? Se tèt chaje komisyon legliz katolik women Jistis ak Lapè (Jilap) di l genyen sou AlterPresse ak AlterRadio.
Malgre volonte ak jefò li montre pou kwape zak kriminèl gang ak zam yo, lapolis nasyonal la manke mwayen ak materyèl konsekan pou bay bon jan rezilta sou teren an. Se konsiderasyon Jilap.
Tout otorite, ki respekte tèt yo, pa dwe ap plenyen bay popilasyon an, nan diskou ak nòt pou laprès, sou plan kèk moun ap manniganse pou fè atak sou lavi premye minis Garry Conille ak lòt manm gouvènman tranzisyon an. Yo ta dwe pito aji pou idantifye ak arete tout sila, ki gen plan sa a jis rive kraze l plat atè. Se dizon komisyon legliz katolik women Jistis ak Lapè (Jilap) sou AlterPresse ak AlterRadio.
Malgre konsèy sekirite a pa t dakò, nan mwa septanm 2024 la, ak demann pou ta fè fòs miltinasyonal la tounen yon misyon lapè Nasyon zini, prezidan Konsèy prezidan pou tranzisyon an, Leslie Voltaire, swete pou sa ta fèt, nan yon lèt li voye bay sekretè jeneral Nasyon zini yo, Antonio Guterres. Se sa jounal ameriken Miami Herald rapòte.
Gen ijans pou lapolis nasyonal d Ayiti a ta gen ase repondong, pou fè fas kare ak laterè plis lòt zak vyolans gang ak zam yo, k ap ogmante chak jou pi plis, sitou nan depatman Lwès ak Latibonit. Se deklarasyon Leslie Voltaire, dapre jounal ameriken Miami Herald.
Detan l leve lavwa kont zak vyolans yo sou teritwa Ayiti a, Òganizasyon leta ameriken yo (Loea) mande kominote entenasyonal la respekte angajman l, nan bay resous moun ak bourad lajan ki ka pèmèt fòs miltinasyonal la bay rezilta sou teren an
Se sekretè jeneral Loea a, natif natal peyi Irigwe Luis Almagro Lemes, ki ekri sa sou kont X li. Almagro di l te pale nan telefòn ak minis zafè etranje peyi d Ayiti a, Dominique Dupuy.
Loea di l kore tranzisyon k ap fèt kounye a nan peyi d Ayiti. Men, li mande Kpt a respekte Konstitisyon peyi d Ayiti a ak tout sa k ekri nan akò 3 avril 2024 la. Li mande tout fanm ak gason ki konsènen yo met enterè peyi d Ayiti yo anlè tout lòt enterè. [ppsf emb rc apr 24/10/2024 15:14]
Consulter +
