Pòtoprens, 29 septanm 2024 [AlterPresse] --- « Noumenmm otorite yo, n ap chèche jwenn sipò lòt peyi pou retabli sekirite a sou teritwa Ayiti a, ni sou waf Pòtoprens lan tou pou pèmèt bato fè ale vini san pwoblèm ».
Se pwomès prezidan Konsèy prezidan pou tranzisyon an (Kpt), Edgard Leblanc Fils, nan moman li retounen dimanch 29 septanm 2024 la nan peyi d Ayiti, apre l sot patisipe nan 79vyèm sesyon Asanble jeneral Nasyon zini yo, semenn pase, dapre enfòmasyon AlterPresse ranmase.
Ant lendi 30 septanm pou rive madi premye oktòb 2024 la, Konsèy sekirite Nasyon zini yo ta dwe deside sou pwopozisyon, pou ta fè fòs miltinasyonal la tounen pito yon misyon lapè Nasyon zini nan peyi d Ayiti.
Jedi 26 septanm 2024 la, douvan Asanble jeneral Òganizasyon Nasyon zini yo, Edgard Leblanc te mande pou fòs miltinasyonal la ta tounen yon misyon lapè Nasyon zini nan peyi d Ayiti.
Leblanc di tout manm gouvènman an mèsi pou solidarite yo, nan fè patisipasyon Ayiti nan Nasyonzini byen pase.
Konsèy prezidan pou trazisyon an (Kpt) ak gouvènman tranzisyon an fè yon sèl, nan sèvis Leta ak peyi d Ayiti.
Se lòt deklarasyon Edgard Leblanc Fils, sou bri k ap kouri ki ta lese konprann ta gen chire pit ant Kpt a ak gouvènman Garry Conille lan.
Pwomès prezidan Kenya a, William Ruto
Disi mwa janvye 2025, k ap vini a, tout polisye peyi Kenya yo ta dwe fin deplòtonnen andedan fòs miltinasyonal la, nan peyi d Ayiti.
Se pwomès prezidan Kenya a, William Ruto, ki t ap pale, semenn pase, douvan Asanble jeneral Nasyon zini yo.
Pwoblèm ekipman, lajan ak lòt ta anpeche anpil peyi, sitou nan Karayib lan, respekte angajman yo te pran pou voye polisye ak militè andedan fòs mitinasyonal la sou teren an, dapre Ruto,
Gang ak zam asasinen plis pase 3 mil 600 moun ant janvye pou rive septanm 2024 la sou teritwa Ayiti a
Ant mwa janvye pou rive septanm 2024 la, gang ak zam yo asasinen pou pi piti plis pase 3 mil 600 moun sou teritwa Ayiti a.
Se yon ranmase Òganizasyon nasyon zini yo nan dat vandredi 27 septanm 2024 la. [ppsf emb rc apr 29/09/2024 15:00]
Consulter +