Dokiman Amnesty International
Dokiman sa a vin jwenn AlterPresse nan dat 2 septanm 2024
An repons a deklarasyon Vis Prezidan Repiblik Dominikèn lan, Raquel Peña, sou enkyetid Amnesty International soulve konsènan responsablite gouvènman Luis Abinader pou envestige, pini ak korije vyolasyon dwa moun ki rive nan kontèks aplikasyon politik migrasyon Repiblik Dominikèn yo, Ana Piquer, direktris Americas nan Amnesty International te di :
« Nou apresye atansyon Biwo Vis Prezidan an te bay rapò nou yo. Men, nou regrèt repons sa a se senpleman yon refi pou rekonèt prèv yo. Responsablite Leta a, nan evènman nou te dokimante yo atravè divès temwayaj, estatistik ak imaj, pa kapab nye. Reziste ak kontwol piblik, non sèlman afebli konfyans nan gouvènman an, men tou andomaje tout moun Leta a dwe respekte ak pwoteje ».
« Amnesty International egzòte gouvènman Luis Abinader ak Raquel Peña a pou yo itilize dezyèm manda konstitisyonèl sa a pou ankouraje yon chanjman pozitif nan politik migrasyon li, nan pran responsablite ak korije politik ak pratik rasis ki vyole dwa moun yo. Sa gen ladan l respekte obligasyon entènasyonal leta yo ak gouvènman li an, konsènan pwoteksyon entènasyonal, epi konfòme li avèk règleman egzekitif lwa sou imigrasyon Dominikèn lan, ki entèdi depòtasyon minè ak fanm ansent ».
Amnesty International, se yon mouvman ki defann ak ankouraje dwa moun atravè monn nan.
Travay prensipal li, se asire tout moun jwi tout dwa moun san diskriminasyon. Nan ka Repiblik Dominiken an, dènye travay Amnesty International la te fèt sou rapò politik migrasyon rasis gouvènman an ap aplike epi ede bati yon Repiblik Dominiken san diskriminasyon.
Consulter +
