Sen Mak (Ayiti), 16 daawout 2024 [AlterPresse] --- Gen anpil anpil prizonye, ki t ap eseye sove nan prizon sivil Sen mak la, ki mouri. Gen polisye nasyonal ak plizyè prizonye ki t ap eseye sove, ki blese tou, nan moman prizonye t ap chèche sove kite prizon sivil Sen Mak la, depatman Latibonit lan, vandredi 16 dawout 2024 la. Imaj sou rezo sosyal yo montre lafimen, ki t ap soti nan prizon sivil Sen Mak la. Plis detay avèk konfrè jounalis Placide Presendieu nan Sen Mak.
Gad prizon sivil Sen Mak yo te fè mouvman pou anpeche prizonye yo chape. Depi plizyè jou, gad prizon sivil Sen Mak yo, ki vle di polisye nasyonal Administrasyon prizon nasyonal yo / Apena, te nan grèv pou ekzije pi bon kondisyon travay, pi bon tretman nan travay yo nan prizon sivil Sen Mak la. Grèv gadyen prizon sivil Sen Mak la pa t pèmèt prizonye yo resevwa manje depi plizyè jou.
Sou AlterPresse ak AlterRadio, lapolis nasyonal d Ayiti a di l reprann kontwòl prizon sivil Sen Mak la. Lajistis ak lapolis Sen Mak la mande popilasyon Sen Mak la ba l enfòmasyon sou tout moun sispèk, li ta remake nan zòn bò lakay yo.
Nan yon nouvo atak jedi 15 dawout 2024 la, gang ak zam Viv ansanm yo asasinen ak bal yon polisye nasyonal epi blese plizyè lòt moun nan katye Solino ak katye ki viwonnen yo. Lapolis nasyonal te voye yon blende pou pote ranfò bay polisye nasyonal, ki nan zòn Solino yo
Jis rive vandredi 16 dawout 2024 la, te gen anpil kout zam ki te kontinye pete nan katye sa yo. Moun nan Solino, Dèlma 24, Fò nasyonal ak katye ki viwonnen yo toujou sou gwo tansyon, akoz kout bal k ap pete yo depi mèkredi 14 dawout 2024 la. Jedi 15 dawout 2024 la, gen plizyè moun ki resevwa bal mawon gang ak zam Viv ansanm yo. Depi plizyè jou, gang viv ansanm yo ap eseye anvayi zòn Solino, Dèlma 24, Fò nasyonal ak lòt katye.
Depi plizyè mwa, Pon Sonde, Lyankou, Ti Rivyè Latibonit, Lestè, Ti Bwadòm nan komin Gwo Mòn, se plizyè kote nan depatman Latibonit lan gang ak zam kontinye fè mannèv pou simen laterè rèd mare toujou. Nou poko santi anyen ki fèt bò kote lapolis nasyonal la ak fòs miltinasyonal la, pou pèmèt tout moun retounen lakay yo ak pran dispozisyon pou lekòl la ka relouvri nan bon kondisyon sekirite nan Latibonit lan. Se kout rèl òganizasyon Latibonit kanpe pou Ayiti (Lakay) nan yon nòt.
Mèkredi 14 dawout 2024 la, lapolis nasyonal la di l rive kraze ak boule yon jaden dwòg marijuana, ki te sou prèske yon kawo tè nan lokalite Bwa Kodenn, seksyon kominal Bèdoranj, komin Belans, depatman Sidès. Mèt jaden sa a, ki ta rele Renoir Alexandre, ki rete nan komin Petyonvil, depatman Lwès la, ta gen tan chape poul li, nan moman lapolis nasyonal la te debake. Se sa lapolis nasyonal la fè konnen.
Lapolis nasyonal la di l deplòtonnen nan plizyè kwen komin Taba a, pou eseye reprann kontwòl zòn, kote bandi ak zam ap simen laterè san gade dèyè yo.
Ant mwa janvye pou rive mwa jiyè 2024 la, bandi ak zam asasinen oswa fè disparèt pou pi piti 66 moun, pami yo 4 polisye nasyonal, yon timoun, 15 fanm ak 12 moun ki te gen ant 60 pou rive 80 lane. Gang ak zam yo fè kadejak sou 46 fanm ak ti fi nan menm peryòd lan. Gang ak zam yo dechèpiye ak boule plizyè santèn kay tou. Yo vòlò plizyè machin ak yon pil ak pakèt machandiz ant mwa janvye pou rive mwa jiyè 2024 la. Se yon ranmase Rezo nasyonal k ap defann dwa moun yo (Rnddh) rann piblik nan dat jedi 15 dawout 2024 la.
Detan y ap bay polisye nasyonal sètifika, ki di yo pa jwenn yo nan move zafè, dwe gen dispozisyon ki pou pèmèt lapolis nasyonal la fè fas kare ak gang ak zam yo divès kote, tankou nan Kafou ak Gresye. Leta dwe degaje l pou reprann kontwòl kòmsadwa nan komin Kafou ak Gresye. Yo dwe arete, trennen douvan lajistis epi jije tout bandi ak zam yo. Leta dwe pote asistans nan divès nivo bay fanmi viktim nan Kafou ak Gresye yo. Dwe gen dispozsyon tou pou retabli lapè ak sekirite, ki ka pèmèt plizyè milye fanmi deplase yo retounen lakay yo. Epi, dwe gen dispozisyon pou met bout nan gaspiyáy resous leta yo. Se kèk pami rekòmandasyon Rezo nasyonal k ap defannn dwa moun yo (Rnddh).
Anpil nan sant ki akeyi moun deplase yo manke dlo ak enstalasyon lijyèn, tankou twalèt. Se yon danje, ki vin ogmante posiblite pou moun deplase yo trape maladi tankou kolera, ki te parèt plizyè fwa nan zòn metwopoliten Pòtoprens lan depi lane 2022. Se avètisman òganis Medsen san fwontyè (Msf), ki swete plis èd imanitè ka al jwenn kominote moun deplase yo.
Dlo, asenisman, sèvis lijyèn, livrezon dlo nan kamyon, met twalèt ak douch yo nan bon kondisyon lijyèn, distribye materyèl lijyèn, fè pwomosyon lijyèn ak sante pou garanti sekirite ak diyite pakèt milye moun, ki sètoblije deplase kite lakay yo nan zòn metwopoliten Pòtoprens lan, akoz laterè ak lòt kalte vyolans gang ak zam yo. Se kèk pami rekòmandasyon òganis Medsen san fwontyè / Msf nan yon ranmase semenn sa a. [ppsf emb rc apr 16/08/2024 15:11]
Consulter +
