Pòtoprens, 19 dawout 2024 [AlterPresse]--- Yon nouvo òganizasyon, ki rele Gwoup medya endepandan ak solidè yo (Gmis) di gwo endiyasyon l, lè l aprann arestasyon jounalis Daniel Banatte, lapolis te jwenn ak zam manch long nan yon machin sèvis leta. Se sa Gmis di nan yon òt, ki vin jwenn AlterPresse ak AlterRadio.
Nou pa nan tetelang ak okenn konfrè ni konsè, ki chwazi tonbe nan vòlè, nan gang oubyen nan koripsyon. Se sa òganizasyon Gwoup medya endepandan ak solidè yo deklare, nan nòt sa a ki pote dat 17 dawout 2024 la.
Gmis lan mande responsab medya yo plis veyatif sou sa jounalis yo ap di nan emisyon yo, pou kenbe valè metye a dyanm, pou kenbe bon jan prensip ak moralite nan ekzèsis metye jounalis la.
Gwoup medya endepandan ak solidè yo mande tou Inite santral ransèyman finansye, ransèyman sou woulman lajan yo / Ucref, Inite lit kont koripsyon / Ulcc ak lapolis nasyonal d Ayiti a pi aktif sou kontwòl pwogresyon jounalis ak responsab medya yo nan sosyete a.
Depi plis pase 2 mwa, Daniel Banatte pa anime ankò emisyon Regrad Aktyalite sou 92.7 fm nan. Se sa responsab Radyo Regard Fm yo ekri sou kont X yo
« Sa fè plis pase 2 mwa Daniel Banatte pa anime emisyon Regard Aktyalite ankò sou 92.7 Fm lan. Nou regrèt lapolis arete yon manm laprès nan kondisyon sa a. Nou kwè lajistis ak lapolis ap pèmèt laverite blayi ».
Se sa responsab Radio Regard Fm yo ekri sou kont X yo, nan dat 16 dawout 2024 la.
Sou 13 moun li arete nan nan operasyon li fè nan Klèsin jedi 15 dawout 2024 la, lapolis nasyonal la di li met men sou 3 polisye nasyonal ak 2 jounalis, Daniel Banatte ak Richelson Cénéjuste.
2 jounalis yo te nan yon machin sèvis leta, kote lapolis di l jwenn fizi manch long ak lòt zam.
Lapolis nasyonal prezante Daniel Banatte kòm jounalis Regard Fm, ak Richelson Cénéjuste kòm jounalis Radyo Pa nou.
Lapolis di li jwenn Banatte ak Cénéjuste nan yon machin koulè blanch sèvis leta Toyota Land Cruiser, plak SE-06202, ak yon zam manch long plis 2 pistolè avèk 15 katouch. [emb rc apr 19/08/2024 11:20]
Consulter +
