Ansdeno (Ayiti), 13 dawout 2024 [AlterPresse] --- Ki jan, finisman semenn pase a, peyizan Ansdeno yo te rive kwape atoufè, ki te vin simen laterè nan zòn lakay yo ? Eleman repons sou AlterPresse ak AlterRadio avèk Dario Louis, prezidan Konsèy administrasyon 2zyèm seksyon kominal Boudon (Son)
Se depi mwa jen 2024 la fanm ak gason peyizan Ansdeno yo tanmen yon mouvman leve kanpe kont degenn bandi yo nan depatman Grandans lan. Sa k pase lannuit samdi 10 pou anttre dimanch 11 dawout 2024 la, se yon zak rezistans ak mobilizasyon fanm ak gason nan Ansdeno, ki bouke ak gang kriminèl k ap simen laterè, vòlò tè ak bèt peyizan yo. Te gen yon bon pati nan popilasyon Boudon, ki te sètoblije kite 2zyèm seksyon kominal Ansdeno a, pou al chèche refij lòt kote, akoz zak atoufè kriminèl yo.
Mowon, Chanbelan, Lèziwa, Dam Mari, Ansdeno, se 5 komin depatman Grandans kote gang ak zam yo ap eseye simaye laterè depi plizyè mwa. Popilasyon nan zòn sa yo bezwen tout kalte sipò pou fè fas kare ak bandi kriminèl sa yo. Se kout rèl sou AlterPresse ak AlterRadio Dario Louis, prezidan Konsèy administrasyon 2zyèm seksyon kominal Boudon, nan Ansdeno.
Ekip tranzisyon peyi d Ayiti a derefize al patisipe nan seremoni enstalasyon prezidan dominiken an Luis Abinader, vandredi 16 dawout 2024 la. Se sa jounalis Jacqueline Charles rapòte sou kont X li.
Depi 4 lane, Luis Abinader toujou ap voye anpil pawòl piman bouk kont peyi d Ayiti. Gen yon nivo vyolans rèd mare kont fanm ak gason natif natal Ayiti yo sou teritwa dominiken an.
Tanzantan, se anpil zak vyolans kont natif natal Ayiti yo. Depi plizyè mwa, gouvènman dominiken an pa asepte okenn moun, ki gen paspò Ayiti, antre nan avyon sou teritwa dominiken an. Nivo vyolans lan vin ogmante anpil depi mwa septanm 2023 a, lè fanm ak gason Wanament, sou fwontyè ak Dajabón nan, deside konstwi yon kannal pou wouze jaden yo, apati larivyè Masak la.
Sitiyasyon difisil, peyi d Ayiti ye jounen jodi a, se yon menas pou lapè ak sekirite nan rejyon Amerik yo. Fòs miltinasyonal la, se yon kokennchenn repons pou vin retabli sekirite ak kè poze kont vyolans gang ak zam yo. Se deklarasyon sou kont X li sekretè leta an apre peyi Etazini pou rejyon Amerik yo, Brian Andrew Nichols.
Gang yo asasinen ak blese plizyè milye moun. Gen plis pase yon demi milyon moun ki sètoblije deplase kite lakay yo pou al chèche refij lòt kote, akoz laterè gang kriminèl ak zam yo. Se yon sityasyon ki vin lakoz yon nivo ensekirite lamanjáy rèd mare, paske degenn gang ak zam yo anpeche pwovizyon fè ale vini ant divès kote sou teritwa Ayiti a. Se lòt konsiderasyon sou kont X li sekretè leta an apre peyi Etazini pou rejyon Amerik yo, Brian Andrew Nichols.
Lè nou pral mennen gwo operasyon sou teren an anvan lontan, chèf gang ak zam yo p ap gen okenn kote pou y ale, ni pou al kache. Nou deja fè bon pwogre, gras ak bon relasyon nou genyen ak lapolis nasyonal la ak gouvènman tranzisyon an. Se dizon kòmandan fòs miltinasyonal la, Godfrey Otunge.
Lendi 12 dawout 2024 la, fòs miltinasyonal la te chita pale ak reprezantan Òganizasyon leta ameriken yo (Loea) nan peyi d Ayiti, Cristobal Dupouy.
Nan ride l jwenn mwayen, ekipman ak materyèl li bezwen yo, Loea ap pote tout sipò l pou fè fòs miltinasyonal la pote bon rezilta sou teritwa Ayiti a. Se angajman Òganizasyon leta ameriken yo, Cristobal Dupouy di kòmandan fòs miltinasyonnal la.
Gouvènman tranzisyon an asepte demann Kominote peyi Karayib yo (Caricom) pou voye ekip fanm ak gason vin gade ki jan operaasyon yo ap fèt, lè va gen eleksyon sou teritwa Ayiti a. Se youn nan eleman ki soti nan chita pale, lendi 12 dawout 2024 la, ant premye minis Garry Conille ak yon delegasyon Caricom, ki nan peyi d Ayiti ant dimanch 11 dawout pou rive vandredi 16 dawout 2024 la.
(nt dimanch 11 pou rive vandredi 16 dawout 2024 la, delegasyon Kominote peyi Karayib yo / Caricom ap fè yon evalyasyon sou jan tranzisyon an ap mache, depi finisman mwa avril 2024 la, nan peyi d Ayiti. Pandan 6 jou sa yo, delegasyon Caricom nan ta dwe chita pale ak otorite tranzisyon yo ak tout sila ki konsènen, sou fason y ap suiv sa k ekri nan akò tranzisyon 3 avril 2024 la. [ppsf emb rc apr 13/08/2024 14:36]
Consulter +
