Akayè (Ayiti), 7 dawout 2024 [AlterPresse] --- 10 moun mouri, yon lòt blese ak 4 kay boule. Se konsekans yon nouvo atak san parèy gang ak zam al fè nan komin Kabarè ak Akayè, madi apremidi 6 dawout 2024 la. Rezistans, lapolis ak popilasyon an te eseye fè, pa t sifi pou kwape degenn gang ak zam sa yo, k ap simen laterè nan Kanayan, Ti Tanyen ak Sous Matla depi plizyè lane. Se deklarasyon ajan ekzekitif enterimè Akayè a Jean Edner Gilles sou AlterPresse ak AlterRadio/
Konsèy ekzekitif enterimè lakomin Akayè a mande gouvènman tranzisyon an ak lapolis nasyonal la pran tout dispozisyon pou ranfòse kapasite lapolis nan komin Akayè a, sou wout nasyonal nimewo 1 an.
Akoz laterè ak lòt kalte vyolans gang ak zam yo, otorite yo deside sispann ekzamen ofisyèl bakaloreya yo, ki pa fèt mèkredi 7 dawout 2024 la ni nan lakomin Akayè, ni nan lakomin Kabarè, sou wout nasyonal nimewo 1 an.
Otorite konsènen yo anvizaje pran dispozisyon pou ta fè elèv yo konpoze, nan yon dat yo poko chwazi, nan ekzamen bakaloreya Akayè yo. Se sa ajan ekzekitif enterimè Akayè a di AlterPresse ak AlterRadio.
Mèkredi 7 dawout 2024 la, ekzamen ofisyèl Leta yo pa rive fèt nan komin Kabarè. Se sa plizyè sous fè AlterPresse ak AlterRadio konnen.
Jan sa ye depi lane 2022, komin Kabarè toujou sou gwo tansyon nan mwa dawout 2024 la, avèk atoufè ak zam, ki gaye divès kote nan komin nan ak nan seksyon kominal yo. Se temwayáy plizyè moun Kabarè, ki sètoblije al kache pou evite yo pa sibi anba zak agresyon atoufè ak zam yo.
Si pa gen anyen ki fèt pou garanti sekirite popilasyon an, lekòl la p ap ka relouvri madi premye oktòb 2024 la. Se kè kase Inyon paran elèv pwogresis Ayisyen yo sou AlterPresse ak AlterRadio.
Inyon paran elèv pwogresis Ayisyen yo deklare li pa fè ministè ledikasyon nasyonal konfyans, sou pwogram cash transfè ant 15 pou rive 20 mil goud, ki ta sipoze al jwenn 280 mil paran nan plizyè depatman, pou prepare rantre lekòl madi premye oktòb 2024 la. Nan demach ki te fèt konsa anvan yo, se sèlman yon ti ponyen paran ki te resevwa kantite lajan, otorite yo te anonse sa gen kèk lane. Se sa Inyon paran elèev pwogresis Ayisyen yo di sou AlterPresse ak AlterRadio.
Depi yon inivèsite pa gen pwòp lopital pa l, pou etidyant ak etidyan fakilte metsin li ka al fè esperyans, inivèsite sa a p ap kapab jwen otorizasyon Leta pou l fonksyone. Se avètisman ministè sante piblik bay nan dat madi 6 dawout 2024 la.
Peyi d Ayiti te konnen 52 tranbleman tè, ant nivo 1 pou rive nivo 3, pandan mwa jiyè 2024 la. 48 pousan nan tranbleman tè sa yo te fèt sou lanmè, nan zòn Nò peyi d Ayiti, kote anba tè a fann divès kote. Se kantite soukous sa yo Biwo min ak enèji di l konte nan yon ranmase koumansman mwa dawout 2024 la.
Nip ki te resevwa 17 tranbleman tè, Nòdwès ki te viv 15 tranbleman tè avèk Lwès 8 tranbleman tè, kote nou jwenn zòn metwopoliten Pòtoprens lan, se depatman sa yo ki te resevwa plis soukous nan mwa jiyè 2024 la. Nan mwa jen 2024 la, te gen 42 tranbleman tè sou teritwa Ayiti a.
Men, teritwa vwazen Ayiti a, Repiblik Dominiken, te konnen 146 tranbleman tè nan mwa jiyè 2024 la. Nivo tranbleman tè yo 3 fwa plis nan Repiblik Dominiken, ki gen yon teritwa 48 mil 442 kilomèt kare, pase nan peyi d Ayiti, ki gen yon teritwa 27 mil 750 kilomèt kare.
Ant mwa janvye pou rive avril 2024, te gen 208 tranbleman tè ki te souke peyi d Ayiti. Se sa Biwo min ak enèji te anrejistre.
An atandan, Inite, ki anchaje kesyon tranbleman tè yo andedan Biwo min ak enèji peyi d Ayiti yo, kontinye mande popilasyon an respekte bon jan kondisyon sekirite, lè y ap konstwi kay. Epitou, otorite yo dwe kontinye fè sansiblizasyon sou katastwòf natirèl yo, tankou tranbleman tè yo, ak prepare estrateji pou fè fas kare ak ijans yo, sizoka ta gen lòt tranbleman tè nan peyi d Ayiti. Se rekòmandasyon Biwo min ak enèji peyi d Ayiti.
Akoz bouyáy 2 radyo te lakoz sou espas kontwòl operasyon nan aryopò entènasyonal Okap la, depatman Nò, Konsèy nasyonal telekominikasyon yo (Conatel) deside fèmen Radyo Oxygene FM 90.9 ak yon estasyon radyo pirat ki rele Radyo Lestomak FM 98.7, ki t ap bay pwoblèm nan zòn nan.
Se sou plent Ofis nasyonal avyasyon sivil peyi d Ayiti a / Ofnac, Conatel te voye yon ekip li al verifye sa k ap pase. Analiz teknik ekip Conatel la pèmèt yo rive idantifye 2 radyo sa yo, ki te lakoz bouyáy nan sistèm kontwòl enfòmasyon operasyon avyon yo, kidonk aterisáy ak lè avyon yo pral deplase, nan aryopò entènasyonal Okap la. Gen yon lòt radyo, ki rele CH Amen 90.7 Fm Okap, otorite telekominikasyon yo ekzije pote koreksyon nan enstalasyon ak siyal yo. Se sa Conatel fè konnen nan yon nòt. [ppsf emb rc apr 07/08/2024 14:13]
Consulter +
