Mizajou 4 dawout 2024 a 23:00
Gantye (Ayiti), 4 dawout 2024 [AlterPresse] --- Nan yon lòt atak yo fè dimanch 4 dawout 2024 la sou biwo ladwann Gantye a, pa twò lwen fontyè Malpas/Malpaso a, gang ak zam 400 mawozo yo met dife nan yon machin blende, lapolis nasyonal la konn fè patwouy moute desann nan komin Gantye a.
Men, kontrèman a enfòmasyon ki t ap sikile anvan, lapolis fè konnen blende sa a te deja an pàn depi kèk tan epi li te estasyone. kidonk, se pa ta yon blende atoufè yo ta pran nan men lapolis.
Se depi dimanch 21 jiyè 2024 la gang ak zam 400 mawozo yo rekoumanse simen laterè san gade dèyè nan komin Gantye a.
Gank ak zam 400 mawozo yo deja sasinen plis pase yon dizèn moun depi dat 21 jiye 2024 la nan Gantye, dapre enfòmasyon disponib yo.
Jedi 25 jiyè 2024 la, gang ak zam 400 mawozo yo te sèvi ak gwo traktè pou kraze plat atè komisarya polis Gantye a, nan depatman Lwès la.
Apre yo te kraze komisarya polis Gantye a, gang ak zam 400 mawozo yo t ap fè mannèv pou kraze yon pon ki konekte Gantye ak Fon Parizyen. Se sa plizyè medya te rapòte finisman mwa jiyè 2024 la.
Malgre prezans polisye nasyonal, lame d Ayiti ak polisye Kenya fòs miltinasyonal la, sitiyasyon an poko janm retounen nan nòmal nan Gantye, pa twò lwen fwontyè Malpas/Malpaso a.
Depi dimanch 21 jiyè 2024 la, gang ak zam 400 mawozo yo ap atake komin Gantye, kote yo asasinen plis pase yon dizèn moun nan laterè y ap kontinye fè a, sou wout ale vini sou fwontyè Malpas/Malpaso a.
Depi menm dimanch 21 jiyè 2024 la, gen anpil anpil moun ki sètoblije kouri deplase kite Gantye, pou al pran refij nan Fon Parizyen, dapre yon ranmase madi 23 jiyè 2024 la Òganizasyon entènasyonal pou migrasyon yo (Oim). [ppsf emb rc apr 04/08/2024 13:30]
Consulter +