Pòtoprens, premye dawout 2024 [AlterPresse] --- Atansyon. lapli k ap tonbe yo ka lakoz inondasyon nan plizyè depatman peyi d Ayiti yo, nin nan Lwès la tou.
Se avètisman espesyalis ayisyen yo nan kondisyon tan an, nan dnye bilten yo ki vi jwenn AlterPresse ak AlterRadio.
Gen danje inondasyon bridsoukou nan depatman Nòdès, Plato santral, Latibonit ak Lwès.
Depi apremidi jedi premye dawout 2024 la, lapli, ki mache ak loráy, t ap tonbe byen fò divès kote.
Jisteman, boulvès nan tan an ap báy bon aktivite lapli, ki mache ak loráy, nan apremidi, nan aswè ak pandan lannuit lan, tout finisman semenn nan, sou depatman Nòdès, Nò, Nòdwès, Latibonit, Plato santral, Sidès, Sid, Grandans, Nip ak Lwès, kote nou jwenn zòn metwopoliten Pòtoprens lan.
Gen nyáj sou depatman peyi d Ayiti yo, depi nan maten.
Tan an pral fèmen nan apremidi ak aswè.
Malgre tou, nivo chalè a kontinye rèd mare sou tout teritwa peyi d Ayiti, depi plizyè semenn. Se menm sitiyasyon an jodi a tou.
Tout moun ap santi yo vin swe anpil anpil.
Se pou sa, fanm kou gason dwe gen yon seri konpòtman, ki ka ride yo fè fas kare ak nivo chalè sa a.
Ansanm ak espesyalis ayisyen yo nan kondisyon tan an, pwoteksyon sivil ankouraje tout moun, fanm ak gason, mete rad laj, rad leje, rad koulè klè.
Kontinye bwè dlo regilye. Rafrechi nou anpil anpil.
Mache ak boutèy dlo pou bwè, lè w soti nan lari. Moun, k al vann nan mache yo, ta dwe mache ak galon dlo pou bwè pandan jounen yo.
Fè atansyon sou konsekans nivo chalè sa a sou lasante nou tout.
Epitou veye sou eta sante timoun ak granmoun yo, avèk gwo nivo chalè sa a.
Pandan jounen an ak lannuit, gen moun ki ka santi yo pa pote yo byen, akoz nivo chalè sa a.
Toujou suiv ak rete okouran enfòmasyon sou kondisyon tan an, pou konnen ki konpòtman nou dwe genyen.
Nivo chalè a kontinye wo anpil nan lajounen. Men, nan moman lapli yo, tanperati a pral bese.
Soti nan nivo 36 degre Sèlsiyis, tanperati a pral desann ant 24 pou al 22 degre Sèlsiyis, nan aswè.
Ki jan lanmè a ye jodi a ?
Detan yo va evite rantre nan fon lanmè a, k ap move anpil anpil, kaptenn bato, chaloup, bwa fouye, pipirit yo, dwe toujou pran prekosyon nesesè yo bò tout kòt peyi d Ayiti yo.
Vag yo ap monte nan nivo 9 pye wotè bò kòt Nò yo, 7 pye wotè bò kòt Sid peyi d Ayiti yo ak 5 pye wotè bò kòt zile Lagonav yo, pa twò lwen Pòtoprens. Gwo lapli k ap tonbe yo pral fè vag lanmè yo move anpil anpil bò kòt zile Lagonav yo. [rc apr 1er/08/2024 13:30]
Consulter +
