Gantye (Ayiti), 26 jiyè 2024 [AlterPresse] --- Jedi 25 jiyè 2024 la, gang ak zam 400 mawozo yo te sèvi ak gwo traktè pou kraze plat atè komisarya polis Gantye a, depatman Lwès.
Se depi dimanch 21 jiyè 2024 la gang ak zam 400 mawozo yo ap atake komin Gantye, kote yo asasinen 4 moun nan laterè y ap kontinye fè a, sou wout ale vini sou fwontyè Malpas/Malpaso a.
Depi menm dimanch 21 jiyè 2024 la, gen anpil anpil moun ki sètoblije kouri deplase kite Gantye, pou al pran refij nan Fon Parizyen.
Sou 3 jou, ant dimanch 21 pou rive madi 23 jiyè 2024 la, se plis pase 3 mil 800 moun ki sètoblije deplase, kite seksyon kominal Peyi pouri nan komin Gantye, akoz atak gang ak zam 400 mawozo yo. Se enfòmasyon Òganizasyon entènasyonal pou migrasyon yo (Oim) te rive ranmase, nan yon premye rapò yo te bay madi 23 jiyè 2024 la.
Nan moman Oim t ap prepare rapò l sou sa k pase Gantye a, gang ak zam 400 mawozo yo t ap rapousuiv zak laterè yo nan komin Gantye. Zak vyolans gang ak zam 400 mawozo yo t ap kontinye jis rive finisman semenn sa a nan Gantye, dapre enfòmasyon disponib yo. Tout moun, laterè gang ak zam 400 mawozo yo fòse deplase, depi dimanch 21 jiyè 2024 la, rive jwenn refij bò kote fanmi, ki resevwa yo nan zòn Fon Parizyen. Se premye eleman enfòmasyon Òganizasyon entènasyonal pou migrasyon yo / Oim rive jwenn.
Plis dispozisyon, tankou plis machin blende pou kwape gang ak zam Latibonit yo. Se ekzijans plizyè òganizasyon pral fè, nan yon manifestasyon pwotestasyon, lendi 29 jiyè 2024 la. Manifestasyon ap soti nan kafou Pon Sonde pou rive nan kafou Òganis devlopman Vale Latibonit lan (Odva), depatman Latibonit lan.
Ranfòse kapasite operasyon lapolis nasyonal d Ayiti a, detan l va asire sekirite ak byennèt tout fanm ak ti fi ki sibi zak kadejak ak lòt abi sou kò yo : se nan objektif sa a LoniFanm remèt, jedi 25 jiyè 2024 la, bay lapolis nasyonal la yon lo materyèl. Aktivite sa a fèt sou baz pwogram ki rele Inisyativ Spotlight, nan tèt kole ak Biwo entegre Nasyon zini nan peyi d Ayiti (Binuh).
Pa t gen pwoblèm, tout bagay byen pase nan ekzamen ofisyèl Leta, semenn sa a, pou 9vyèm ane fondamantal yo, lekòl nòmal enstititè yo ak sant edikasyon fanmi yo. Kounye a, yo pral chita sou operasyon koreksyon fèy ekzamen sa yo. Se dizon ministè ledikasyon nasyonal, nan yon kozman ak laprès jedi 25 jiyè 2024 la.
Pou mande yo travay sou plizyè milyon dola Leta peyi d Ayiti te mal depanse, tankou sa yo sispèk ki ta mal fèt nan Biwo pou fè pwogram èd pou devlopman yo bay lajan, premye minis Garry Conille di l te chita pale ak responsab Lakou dèkont, Enspeksyon jeneral finans, Inite lit kont koripsyon ak pakè tribinal sivil Pòtoprens lan. Se sa l ekri sou kont X li.
Se jounalis Jacques Desrosiers Asosyasyon jounalis ayisyen ansanm ak òganizasyon SOS Jounalis di yo chwazi kòm delege, ki pou vin manm Konsèy elektoral pwovizwa a (Kep), ekip tranzisyon an dwe met kanpe nan mwa k ap vini yo. Se sa SOS jounalis fè konnen. [ppsf rc apr 26/07/2024 14:42]
Consulter +
