Ti Gwav (Ayiti), 24 jiyè 2024 [AlterPresse] --- Ministè sante piblik peyi d Ayiti fè konnen li gen enfòmasyon sou kèk moun ki ta gen siy maladi chabon nan lokalite Fò Wayal, nan premye seksyon kominal Ti Gwav, depatman Lwès.
Moun sa yo ta montre siy maladi chabon, apre yo te fin manje vyann zannimo ki mouri bridsoukoum dapre sa ministè sante piblik peyi d Ayiti di nan yon nòt ki vin jwenn AlterPresse ak AlterRadio.
Ministè sante piblik peyi d Ayiti di li louvri yon ankèt pou konnen dekiprevyen sou maladi chabon sa a, yo sispèk ki ta genyen sou teritwa Ayiti a.
Popilasyon an ta dwe evite kontak ak zannimo ki malad oswa ki mouri bridsoukou. Yo ta dwe siyale bay otorite yo tout ka maladi, ki ta sanble ak maladi chabon. Epi bay enfòmasyon sou tout moun yo ta sispèk ki gen sentom ki ta sanble ak maladi chabon. Se rekòmandasyonn ministè sante piblik peyi d Ayiti, sou bri k ap kouri byen fò, jis nan peyi Repiblik Dominiken, kòmkwa ta gen maladi chabon yo ta dekouvri sou teritwa Ayiti a.
Tout moun dwe toujou lave men yo ak savon, depi yo te fin nan kontak dirèk ak zannimo. Epi yo dwe al chèche bay zannimo yo vaksen kont maladi chabon. Se lòt konsèy ministè sante piblik peyi d Ayiti bay.
Ministè sante piblik di li pran tout dispozisyon pou garanti sekirite popilasyon an sou teritwa Ayiti a. Detan l ap pran tout dispozisyon pou fè prevansyon ak tout lòt kontwòl nesesè yo, ministè sante piblik peyi d Ayiti di li pran tout dispozisyon pou anpeche maladi chabon ta gaye sou teritwa Ayiti a.
Se yon mikwòb, ki rele Bacillus Anthracis nan langaj teknik, ki bay maladi chabon an. Mikwòb sa a ka kontaminen moun ki nan kontak dirèk dirèk ak zannimo, ki deja enfekte. Moun, ki ta manje vyann kontaminen sa yo, ka trape maladi chabon an.
Moun ki ta trape maladi chabon an ap wè yo vin gen mak koulè nwa sou po kò yo, ki pa bay gwo doulè. Se avètisman ministè sante piblik peyi d Ayiti bay, nan yon nòt pou laprès. [ppsf rc apr 24/07/2024 14:55]
Consulter +
