Okap (Ayiti), 19 jiyè 2024 [AlterPresse] ---Yon kantite moun (yo poko gen chif ekzat) mouri ak disparèt, plizyè blese grave epi 37 lòt rive chape, byen bonè maten mèkredi 17 jiyè 2024 la (ant 4trè pou rive 5è dimaten), lè dife pete nan yon bato ki te fèk kite zòn Fò Sen Michel, Okap, depatman Nò, pou ale nan Providenciales, sou zil Tik and Caicos, ki pa twò lwen Okap.
Bato a te chaje ak anpil fanm ak gason natif natal Ayiti, ki t ap pran direksyon Providenciales moun yo konn rele Provo, sou zil Tik and Caicos. Dife a ta pran sou bato a, ki vin koule ak moun yo. Gen anpil nan moun yo ki blese grav epi anpil anpil lòt disparèt, dapre temwayáy moun ki chape yo bay.
Ansyen jounalis AlterPresse ak AlterRadio, Karenine Francesca Theosmy, mouri ak 37 lane sou tèt li, anba maladi nan vil Pari, kapital peyi Lafrans, nan dat dimanch 7 jiyè 2024. Se nan AlterPresse Francesca Theosmy, ki te fèt nan dat 24 janvye 1987, te koumanse travay kòm jounalis. AlterPresse ak AlterRadio voye senpati l bay fanmi ak zanmi Francesca Theosmy.
Tout dispozisyon pran pou ekzamen ofisyèl Leta, k ap koumanse apati lendi 22 jiyè 2024 la sou teritwa Ayiti a. Se garanti minis ledikasyon nasyonal la, Augustin Antoine, bay nan yon kozman ak laprès jedi 18 jiyè 2024 la.
Peryòd ekzamen ofisyèl Leta yo, se yon gwo randevou Leta peyi d Ayiti genyen ak jèn yo, fi kou gason, pou fè evalyasyon aprantisay yo. Se yon randevou tout sosyete a pa ka rate, malgre tout difikilte yo. Ekzamen ofisyèl yo, se dabò zafè Leta, men tou se zafè tout sosyete a. Se pou sa ministè ledikasyon nasyonal mande tout moun, tout sila ki konsènen yo kole zepòl ak zepòl pou pèmèt operasyon ekzamen yo byen pase, nan enterè tout jèn fi ak gason kandida, ki pral konpoze yo. Se konsiderasyon minis ledikasyon nasyonal, Augustn Antoine.
Se sèlman kèk lekòl, ki rete pou remèt fich ekzamen bay elèv yo. Ministè ledikasyon nasyonal fin fè travay pa l yo sou kesyon fich ekzamen pou elèv yo, nan tout distri lekòl yo. Se dizon direktè jeneral Biwo nasyonal ekzamen Leta yo, Renan Michel, ki fè konnen tout bagay deja pare pou ekzamen ofisyèl Leta yo, nan kozman ak laprès jedi 18 jiyè 2024 la.
Kandida, ki te sètoblije kite yon depatman pou ale nan yon lòt depatman, akoz laterè ak lòt vyolans gang ak zam yo, ta dwe fè jefò al pran fich ekzamen yo prese prese, nan direksyon depatman lekòl, kote yo ye kounye a. Se yon fason pou otorite ledikasyon nan depatman yo ka di yo ki kote yo pral konpoze. Se avétisman Direksyon jeneral Biwo ekzamen Leta yo.
Se plis pase 183 mil elèv, jèn fi ak jèn gason, ki pral konpoze nan ekzamen 9vyèm ane fondamantal yo apati lendi 22 jiyè 2024 la sou teritwa Ayiti a. Ap gen plis pase 2 mil 700 kandida, k ap konpoze pou Lekòl nòmal enstititè yo. Epi ap gen 451 elèv k ap konpoze pou Sant edikasyon fanmi yo.
Dispozisyon sekirite pou ekzamen ofisyèl Leta yo te diskite nan yon reyinyon Konsèy siperyè lapolis nasyonal la (Cspn), lannuit jedi 18 jiyè 2024 la.
Pou garanti sekirite yo, tout jounalis yo ta dwe pran anpil prekosyon, lè y ap kouvri operasyon lapolis yo kont gang ak zam yo. Se konsèy responsab ekzekitif enterimè lakomin Pòtoprens lan sou AlterPresse ak AlterRadio.
Jounalis yo dwe evite suiv blende lapolis yo oswa lòt ekipman militè, ki nan operasyon sou teren an. Jounalis yo toujou kapab fè repòtaj pou rasanble enfòmasyon sou preparasyon operasyon yo. Men, yo dwe rete nan bon distans nan moman gen operasyon kont gang ak zam yo. Se konsèy ajan ekzekitif enterimè Lakomin Pòtoprens lan.
Nou sezi wè ki jan yon pakèt jounalis te mete lavi yo an danje, lè yo t al anvayi espas operasyon, lapolis nasyonal la t ap mennen ak polisye Kenya yo, mèkredi 17 jiyè 2024 la, anba lavil la ak sou Gran Ri Pòtoprens lan. Polisye yo dwe bare kote yo pa vle lòt moun vini ak franchi, nan moman y ap mennen operasyon yo. Se rekòmandasyon Asosyasyon jounalis ayisyen yo (Ajh) sou AlterPresse ak AlterRadio.
Jounalis k ap feraye sou teren an dwe pwoteje lavi yo. Yo dwe gen yon konpòtman responsab ak pwofesyonèl, pou yo pa viktim nan ekzèsis travay yo, tankou nan moman twoke kòn lapolis ak gang ak zam yo. Se rekòmandasyon Asosyasyon ayisyen medya ki sou entènèt yo sou AlterPresse ak AlterRadio.
Jounalis k ap feraye sou teren an dwe evite bay enfòmasyon, k ap di bandi yo pozisyon fòs sekirite yo ak ki jan operasyon yo ap mache. Sou baz yon plan batay y ap prepare depi plizyè semenn, lapolis nasyonal la, lame ansanm ak fòs miltinasyonal la, pral aji nan 14 komin, ki anba kontwòl gang ak zam yo. Se deklarasyon Garry Conille, ki pa site tout 14 komin konsènen yo, nan mesaj li bay lannuit mèkredi 17 jiyè 2024 la.
Konsèy prezidan pou tranzisyon an (Kpt) ap travay ak gouvènman tranzisyon an pou retabli sekirite sou teritwa Ayiti a.
Nan yon semenn, pral gen yon Konsèy elektoral pwovizwwa (Kep), ki pral anchaje prepare eleksyon 2025 yo. Konsèy prezidan pou tranzisyon an (Kpt) deja travay sou estrikti ki pral asire kontwòl aksyon gouvènman tranzisyon an. Kpt a deja reflechi sou dekrè refòm nan Konstitisyon an. Se sa konseye prezidan Leslie Voltaire fè konnen, nan yon vizit, ansanm ak direktè jeneral lapolis la Rameau Normil, nan katye jeneral fòs miltinasyonal pou kore sekirite a nan peyi d Ayiti, vandredi 19 jiyè 2024 la.
Sekirite ak dispozisyon pou respekte dwa moun yo te nan diskisyon ant premye minis Garry Conille ak plizyè òganizasyon dwa moun, nan yon reyinyon jedi 18 jiyè 2024 la. [ppsf rc apr 19/07/2024 14:33]
Consulter +
