Pòtoprens, 5 jiyè 2024 [AlterPresse] --- Jedi 4 jiyè 2024 la, bandi ak zam asasinen ak bal plizyè moun nan zòn metwopoliten Pòtoprens lan, pami yo 2 enspektè lapolis, Lozama Telemaque ak Yves Nord, nan Akachon 32, komin Kafou.
Ant mwa janvye pou rive koumansman mwa jiyè 2024 la, sa fe 23 polisye nasyonal bandi ak zam asasinen anba bal nan peyi d Ayiti. Se yon ranmase AlterPresse ak AlterRadio.
Bandi ak zam yo ale ak kò 2 enspektè polis, yo asasinen nan Akachon 32, komin Kafou, jedi 4 jiyè 2024 la. Se sa Sendika nasyonal polisye ayisyen yo (Synapoha) rapòte sou kont X li.
Polisye nasyonal yo kontinye mouri anba bal asasen, paske otorite yo poko janm pran dispozisyon konsekan kont zak laterè gang ak zam yo. Se konsiderasyon Sendika lapolis nasyonal d Ayiti a (Spnh-17), ki mande alatèt lapolis yo pran bon jan dispozisyon pou kwape degenn gang ak zam yo.
Spnh-17 di li tris anpil lè l aprann kò sasináy sou enspektè polis Lozama Telemaque ak Yves Nord an. Spnh-17 di tou li voye senpati l bay fanmi 2 polisye nasyonal sa yo ak tout enstitisyon lapolis nasyonal la ki pèdi ankò 2 polisye.
Menm jedi 4 jiye 2024 la, bandi ak zam asasinen ak bal 2 moun nan komin Petyonvil, depatman Lwès la. Poko gen twop enfòmasyon sou sikonstans kò sasinay sa yo nan Petyonvil.
Dimanch 30 jen ak lendi premye jiyè 2024 la, gang ak zam asasinen plis pase 20 fanm ak gason nan komin Gresye, sou wout nasyonal nimewo 2 a, kote yo met dife nan anpil anpil kay.
Lendi premye jiyè 2024 la, menm gang ak zam sa yo te asasinen Francin Jean, yon chofè transpò piblik Jakmèl/Pòtoprens, ki t ap pase nan yon wout anndan komin Gresye a. Gang ak zam sa yo te boule kò chofè transpò piblik sa a.
Jedi 4 jiyè 2024 la, gang ak zam Belè yo blese ak bal plizyè moun, nan katye Solino ak Fò nasyonal, Pòtoprens, ki te anba gwo kè sote avèk kout bal ki t ap pete san gade dèyè yo.
Madi 2 jiyè 2024 la, endividi yo poko idantifye t al kraze brize nan estasyon ponpaj dlo Leta, ki nan komin Taba, depatman Lwès la. Se yon zak kraze brize, ki pral gen konsekans sou distribisyon dlo potab nan komin Taba, nan zòn aryopò entènasyonal Pòtoprens lan ak nan plizyè katye komin Dèlma. Se kout rèl Direksyon nasyonal dlo potab ak asenisman (Dinepa).
Nan zak kraze brize madi 2 jiyè 2024 la, endividi yo poko idantifye yo vòlò batri, koupe kab kouran epi fè domaj nan plizyè lòt materyèl estasyon ponpaj dlo nan Taba a. Se avètisman Direksyon nasyonal dlo potab ak asenisman (Dinepa).
Verèch an Ayiti yo, ki vle di pil pil fatra ki anvayi sitou bò kòt Sidès ak Sid peyi d Ayiti yo, pa fatra sèlman. Yo ofri anpil pòtinite. Se rekòmandasyon jounalis Nancy Roc ak espesyalis nan anviwónman Paul Judex Edouarzin, ou ka li nan espas entènèt AlterPresse.
Plizyè òganizasyon sou zile Lagonav tanmen yon mobilizasyon pou ekzije leta pran responsablite l douvan pakèt pwoblèm anviwónman, ki menase zile Lagonav la. Se kout rèl plizyè òganizasyon nan emisyon Pou demen ka bèl, ki pase sou AlterRadio 106.1 Fm ak divès lòt platfòm entènèt.
Nan yon tan ki p ap twò long, ekip tranzisyon an pral mete estrikti modèn nan sistèm tout anbasad ak konsila peyi d Ayiti aletranje yo. Nou pral mete tou plis resous moun pou pote solisyon nan pwoblèm paspò pou Ayisyèn ak Ayisyen k ap viv nan lòt peyi yo. Se pwomès premye minis Garry Conille, nan moman li t a p vizite, semenn sa a, anbasad peyi d Ayiti nan Washington, peyi Etazini. [ppsf emb rc apr 05/07/2024 14:08]
Consulter +
