Pòtoprens, premye jiyè 2024 [AlterPresse] --- Siklòn Beryl, ki nan lanmè zile Karayib yo, kapab báy plis aktivite lapli sou depatman peyi d Ayiti yo, sitou sou zòn Sid yo.
Gen anpil anpil moun Gresye gang ak zam asasinen lakay yo, nan yon lòt atak y al fè dimanch 30 jen 2024 la. Gang ak zam yo anvayi ankò komisarya polis Gresye a. Polisye nasyonal ki te la yo te kouri kite komisarya polis Gresye a.
Lendi premye jiyè 2024 la, menm atoufè ak zam sa yo asasinen nan Gresye yon chofè transpò piblik, ki fè Jakmèl/Pòtoprens, epi boule kò l.
Gang ak zam yo asasinen ak plizyè bal chofè transpò piblik sa a, ki t ap eseye pase nan yon wout andedan Gresye. Epi yo boule kadav li. Se sa Asosyasyon pwopriyetè ak chofè d Ayiti yo / Apch rapòte sou kont X li.
Kò sasináy sa a sou yon lòt chofè tranpò piblik vin lonje lis chofè, gang ak zam ap plede asasinen sou teritwa Ayiti a. Se kout rèl sendika chofè transpò piblik, ki rele Sektè transpò sou wout yo nan peyi d Ayiti.
Sendika lapolis nasyonal d Ayiti a (Spnh-17) mande alatèt lapolis nasyonal yo pran bon jan dispozisyon pou kwape gang ak zam yo, k ap simen laterè nan komin Gresye, sou wout nasyonal nimewo 2 a.
Atak gang ak zam dimanch 30 jen ak lendi premye jiyè 2024 la nan Gresye montre lapolis nasyonal la pa t janm rive reprann kontwòl ni komisarya lapolis Gresye a, ni tout komin Gresye a.
Vandredi 10 me 2024 la, gang ak zam t al met dife nan komisarya lapolis Gresye a. Atak sa a te fòse plizyè moun Gresye kouri kite lakay yo pou al chèche refij nan Leyogán, espesyalman sou laplas piblik Leyogán nan.
Sendika nasyonal polisye ayisyen yo (Synapoha) bat bravo pou desizyon alatèt lapolis nasyonal yo, ki lonmen 2 nouvo responsab nan direksyon lapolis depatman Lwès la.
Samdi 29 jen 2024 la, direksyon jeneral lapolis nasyonal la enstale 2 nouvo responsab nan tèt lapolis depatman Lwès la.
Komisè polis Julbert Conseillant responsab kounye a Direksyon lapolis depatman Lwès 1 an, ki vle di Ddo 1. Direksyon lapolis depatman Lwès 1 an gen sou kont li komisarya ak pòs polis komin Pòtoprens, Petyonvil, Kenskòf, Kafou, Gresye, Leyogán, Gran Gwáv ak Ti Gwáv. Komisè polis Xavier Seide anchaje kounye a Direksyon lapolis depatman Lwès 2 a, ki vle di Ddo 2. Direksyon lapolis depatman Lwès 2 a gen sou kont li komisarya ak pòs polis komin Dèlma, Site Solèy, Kwadèboukè, Taba, Akayè ak zile Lagonav.
Gen ijans bon jan dispozisyon pou kwape laterè gang ak zam yo nan depatman Latibonit la. Se ekzijans kolektif sitwayèn ak sitwayen Latibonit kont ensekirite, nan yon lèt tou louvri yo voye bay nouvo direktè jeneral pou yon bout tan lapolis nasyonal d Ayiti a, Rameau Normil.
Dispozisyon pou retabli sekirite a kòmsadwa, se premye siyal popilasyon an ap tann nan men ekip tranzisyon an ak nouvo ekip lapolis nasyonal la. Ta dwe gen pase men ki fèt nan direksyon lapolis Latibonit la. Lapolis nasyonal la dwe wete depatman Latibonit lan anba grif kriminèl ak zam yo. Se demann kolektif sitwayèn ak sitwayen Latibonit kont ensekirite, nan yon lèt tou louvri yo voye bay Rameau Normil.
Sosyològ Herold Toussaint, ki se pwofesè nan inivésite, lonje dwèt sou elit politik, ekonomik, entelektyèl yo, li di ki pa renmen Ayiti. Se sa ki lakoz kokenn kriz plizyè dimansyon peyi d Ayiti ap travèse a, jistan fòs etranje vin met pye yon lòt fwa ankò sou teritwa Ayiti a. Se konsiderasyon pwofesè Herold Toussaint nan emisyon TiChèzBa, ki pase sou AlterRadio 106.1 Fm ak divès lòt platfòm entènèt.
Nan yon kozman ak laprès, sendika anplwaye ministè ledikasyon nasyonal mande odit ak plizyè lòt dispozisyon andedan ministè ledikasyon nasyonal.
Ta dwe gen bon jan dispozisyon pou kwape koripsyon, sa k pa sa andedan ministè ledikasyon nasyonal. Dwe gen amelyorasyon nan kondisyon traváy anplwaye ministè a. Lakou dèKont ta dwe vin fè odit sou jan ekip, ki te la anvan yo, te mennen bak ministè ledikasyon nasyonal la. Se kèk pami rekòmandasyon anplwaye ministè ledikasyon nasyonal, nan yon kozman ak laprès, lendi premye jiyè 2024 la, [ppsf emb rc apr 01/07/2024 13:51]
Consulter +