Pòtoprens, 26 jen 2024 [AlterPresse] --- Premye gwoup polisye Kenya yo, ki vini madi 25 jen 2024 la, pare pou ride n reprann kontwòl teritwa Ayiti a, nan chak katye, chak kay, chak vil. Se pwomès premye minis Garry Conille, nan moman li t al vizite, mèkredi 26 jen 2024 la, nan Klèsin, tou prearyopò entènasyonal Pòtoprens lan, kote premye gwoup polisye Kenya yo tabli.
Popilasyon an dwe rete veyatif, kenbe konfyans nan sa k pral fèt yo. Nou salye angajman gouvènman ak pèp Kenya a ki kanpe ak peyi d Ayiti. Gen lòt eleman k ap vini anvan lontan, pou konplete fòs miltinasyonal la nan ride lapolis nasyonal la ak lame d Ayiti, ki pa janm sispann mennen operasyon sou teren an pou pwoteje lavi ak byen popilasyon an. Se sa Conille fè konnen.
Pou rezon sekirite, jan nou ka konprann sa, gouvènman tranzisyon an p ap di konbyen polisye Kenya ki rive Pòtoprens, madi 25 jen 2024 la. Men, nou gen 455 fanm ak gason polisye ayisyen ki rejwenn inite espesyal lapolis nasyonal yo pou fè fas kare ak gang ak zam yo. Se lòt deklarasyon Garry Conille, ki te ansanm ak minis lajistis la Carlos Hercule plis direktè jeneral pou yon bout tan lapolis la Rameau Normil.
Depoze zam yo ak rekonèt otorite Leta a anvan tout lòt dispozisyon. Se avètisman, Garry Conille bay gang ak zam yo, k ap simen laterè sou teritwa nasyonal la. Conille, ki te ansanm ak yon reprezantan gouvènman Kenya a, doktè Monica Juma, t ap pale nan yon kozman ak laprès madi 25 jen 2024 la.
Mèkredi 26 jen 2024 la, gouvènman Kanada a anonse yon bourad 5 milyon 700 mil dola kanadyen, an diplis sou 80 milyon 500 mil dola kanadyen, l ap bay pou kore deplòtonnáy fòs miltinasyonal pou kore sekirite a nan peyi d Ayiti.
Se te nan mwa fevriye 2024 la gouvènman Kanada a te pwomèt 80 milyon 500 mil dola kanadyen. Gouvènman Kanada a di l ap kontinye travay avèk gouvènman lòt peyi, ki pwomèt y ap voye polisye vin ride lapolis nasyonal la fè fas kare ak gang ak zam yo sou teritwa Ayiti a. Se sa ministè zafè etranje Kanada ekri nan yon kominike mèkredi 26 jen 2024 la.
Nou swete bon jan rezilta san pèdi tan, pou soulaje popilasyon an ki pa sispann viktim, pou tout aktivite yo reprann nan tout peyi a, yon fason pou ride kreye kondisyon anfavè eleksyon. Polisye Kenya ak Ayiti yo dwe respekte dwa moun ak evite fè menm erè, fòs miltinasyonal ki te la anvan yo te fè nan peyi d Ayiti. Se pozisyon pati politik Fizyon sosyal demokrat. Se dizon pati politik Fizyon sosyal demokrat, ki te kore rejim defakto Ariel Henry an, ki pa bay rezilta pandan 33 mwa li te gen mayèt politik peyi d Ayiti a.
Gen bato ak avyon ki pote dwòg nan espas gang ak zam yo okipe sou teritwa Ayiti a. Se yon ranmase, pou peryòd lane 2014 pou rive 2023, Òganizasyon sitwayèn ak sitwayen pou yon lòt Ayiti (Ocnh), lavèy jounen entènasyonal (26 jen chak lane) kont abi ak trafik dwòg yo.
Politik lese grennen an dwe sispann nan batay kont trafikan dwòg yo. Gang ak zam yo pa sèlman sèvi ak zak kidnaping pou fè lajan. Gang ak zam yo gen pwòp trafikan pa yo, k ap fè pase, achte ak vann dwòg pou yo. Se sa k ap fèt nan Vilaj dedye a, Pòtoprens, ki tounen yon kote dwòg ap debake tanzantan. Manke majistra-jij nan sistèm lajistis la, pou trete doyse dwòg yo. Se konsiderasyon Òganizasyon sitwayèn ak sitwayen pou yon lòt Ayiti, ant lane 2014 pou rive 2023 nan peyi d Ayiti.
Majistra-jij yo dwe gen fòmasyon espesyal sou dosye dwòg yo. Kapasite lajistis la dwe ranfòse, pou ankouraje ankèt ak bon jan pwosè sou tout dosye dwòg yo. Se kèk pami rekòmandasyon Òganizasyon sitwayèn ak sitwayen pou yon lòt Ayiti (Ocnh).
Dwe gen dispozisyon pou met kanpe yon pakè nasyonal kont koripsyon. Yo dwe tabli yon bank enfòmasyon sou dwòg, ak patisipasyon òganis dwa moun yo avèk moun k ap feraye nan lajistis la. Yo dwe tou fè transparans sou tout chajman dwòg otorite yo sezi. Se rekòmandasyon Òganizasyon sitwayèn ak sitwayen pou yon lòt Ayiti, ki rann piblik yon ranmase sou pwoblèm dwòg la nan peyi d Ayiti, ant lane 2014 pou rive 2023.
Mèkredi 26 jen 2024 la, gadkòt peyi Etazini yo arete sou lanmè 87 gason, 30 fanm ak 3 timoun natif natal Ayiti, yo te jwenn nan yon bato, zòn Key West nan Leta Florid, peyi Etazini. Se sa jounal ameriken Miami Herald rapòte. [ppsf emb rc apr 26/06/2024 14:29]
Consulter +
