Español English French Kwéyol

Virewon aktyaite Ayiti : Premye mins Garry Conille soti lopital dimanch 9 jen 2024 la, apre yo te mennen lopital dèske l te ge difikilte pou respire samdi swa 8 jen 2024 la

Petyonvil (Ayiti), 09 jen 2024 [AlterPresse] --- Akoz difikilte Garry Conille te genyen pou respire byen, dèske l pa t santi l byen bridsoukou, yo mennen premye minis Garry Conille al entène lopital Petyonvil, samdi swa 8 jen 2024 la. Sitiyasyon lasante Garry Conille nòmal kounye a. Se sa biwo kominikasyon premye minis la di nan yon nòt.

Doktè yo di m premye minis Garry Conille pa pi mal. Eta sante l nòmal. Se mesáy kòdonatè aksyon nan Konsèy prezidan pou tranzisyon an (Kpt), Edgard Leblanc Fils, ekri sou kont X li, apre l te rann yon vizit, lannuit samdi 8 jen 2024 la, nan lopital kote Garry Conille ap pran swen nan komin Petyonvil.

Èske Garry Conille te deja malad ? Èske cháy responsablite leta yo ta deja twò lou sou zepòl li, yon semenn apre l rantre nan peyi d Ayiti, samdi premye jen 2024 la ? Èske pwoblèm pou respire sa a pral gen konsekans sou aktivite Garry Conille kòm chèf gouvènman tranzisyon an ? Se anpil kesyon k ap poze nan peyi d Ayiti, jounen jodi a.

Ki lè popilasyon an ap santi tout bon yon tranzisyon kòmanse nan peyi d Ayiti ? Eleman repons ak Eric Sauray, ki se espesyalis nan syans politik, avoka ak plimeyank, nan emisyon TiChèzBa, ki pase sou AlterRadio 106.1 Fm ak divès lòt platfòm entènèt.

Enjenyè agwonòm, ki pral anchaje ministè agrikilti pandan peryòd tranzisyon an, se ta dwe yon moun ki kapab konprann tout kalte pwoblèm, ki genyen nan agrikilti peyi d Ayiti yo. Se ta dwe yon moun ki ka pote solisyon konsekan nan pwodiksyon agrikiti a ak sekirite lamannjáy la. Anplis yon fòmasyon solid, se ta dwe yon moun onèt, ki gen prensip ak moralite, ki pa mele nan okenn eskandal ak chire pit, epi ki ka fè tout moun k ap fè jaden yo reprann konfyans, nan angajman li va pran pou fanm ak gason peyizan yo. Konsèy prezidan pou tranzisyon an ak premye minis Garry Conille ta dwe pale ak òganizasyon peyizan yo, estrikti nan sosyete yo ak divès lòt sektè konsekan nan kominote yo sou ki kalte moun, yo va chwazi pou vin minis agrikilti. Se pwopozisyon òganizasyon Pwomosyon pou devlopman (Promodev), k ap feraye nan agrikilti ak anviwónman peyi d Ayiti depi dat 5 jen 2000.

Samdi maten 8 jen 2024 la, ansanm ak konseye prezidan Louis Gerald Gilles, Garry Conille t al gade kouman aktivite yo ap mache nan aryopò entènasyonal Pòtoprens lan. Depi koumansman mwa jen 2024 la, operasyon ale vini avyon komès yo rekoumanse nan aryopò entènasyonal Pòtoprens lan, apre 3 mwa kanpe akoz laterè gang ak zam yo.

Nou salye jefò lapolis, lame ak lòt moun, ki pèmèt operasyon ale vini avyon komès yo reprann nan aryopò entènasyonal Pòtoprens lan. Se deklarasyon Louis Gerald Gilles ak Garry Conille, nan moman yo t al gade kouman aktivite yo ap mache nan aryopò entènasyonal Pòtoprens lan, samdi maten 8 jen 2024 la.

Boukante lide sou fason lapè ka blayi toupatou nan monn lan. Se objektif yon woumble, k ap fèt nan Oslo, kapital peyi Nòvèj, ant dimanch 9 pou rive jedi 13 jen 2024 la. Konseye prezidan pou tranzisyon an, Laurent Saint-Cyr, ap patisipe nan woumble sa a, nan peyi Nòvèj.

Tankou sa te pase samdi premye jen 2024 la, kout bal te pete ankò samdi maten 8 jen 2024 la nan katye Catalpa ak Cassagnol, nan Dèlma 75. Kout bal sa yo te lakoz ankò gwo tansyon nan Dèlma 75, dapre temwayáy ki vin jwenn AlterPresse ak AlterRadio.

Lapolis nasyonal la fè konnen li sezi yon machin Suzuki Grand Vitara ak Ford Ranger, lakay manman Aristel Moïse nan komin Kotdefè, depatman Sidès. Lapolis nasyonal la di li te arete, lendi 27 me 2024 la, nan komin Ti Gwáv, sou wout nasyonal nimewo 2 a, Aristel Moïse, li sispèk kòm asosye gang ak zam.

Samdi 8 jen 2024 la, moun sou fwontyè Malpas/Malpaso pase alenfinitif Sanson Louis, apre lapolis Repiblik Dominiken te fin remèt li bay otorite ayisyen yo. Sanson Louis, otorite lòt bò fwontyè te arete sou teritwa vwazen Ayiti a, se ta yon asosye gang ak zam 400 mawozo, k ap opere sou wout Kwadèboukè/Malpas la depi plizyè lane.

Se ta petèt nan 2 semenn, kidonk disi finisman mwa jen 2024 la, polisye peyi Kenya yo ta kapab vin deplòtonnen sou teritwa Ayiti a. Se yon lòt pwomès ankò prezidan peyi Kenya a, William Ruto, detan l t ap patisipe nan yon sèvis lapriyè, dimanch 9 jen 2024 la. Se sa medya peyi Kenya rapòte.

Lendi 27 me 2024 la, William Ruto te deja pwomèt se ta nan 3 semenn polisye Kenya yo ta ka vin deplòtonnen sou teritwa Ayiti a. Se sa l te di nan yon entèvyou li te báy medyan angle British broadcasting corporation (BBC), ki tabli nan vil Lonn, kapital peyi Angletè, depi dat 18 oktòb 1922. [ppsf emb rc apr 09/06/2024 13:42]