Nòt kondanasyon zak kidnapin ak ansasinay jij Verto Vertilus 13 me pase nan Lestè (Latibonit, nò)
Dokiman sa a vin jwenn AlterPresse 15 me 2024
Rezo Nasyonal Majistra Ayisyen yo (Renama) ap denonse zak vyolans kidnapin san rezon ki fèt nan jou lendi 13 Me a sou Majistra Verto VERTILUS, ki se jij titilè komin Lestè. Majistra a viktim anba men gwoup gang k ap opere nan zòn sa pandan l te kite biwo l dèyè yon moto pou antre lakay li. E depi lè sa a pèsonn pat gen nouvèl Jij la e fanmi an pat konn ki moun pou yo te rele pou mande esplikasyon sou sa ki rive jij la. Se nan lajounen madi 14 Me a yo ta dekouvri kadav jij la nan raje.
Sa k pi rèd la menm lapolis pa an mezi bay bourad pou al chèche rès kò jij la kote l ta ye nan raje a. Se domaj, aprè tout sakrifis Jij Vertilus fè pou l sèvi lajistis peyi l pou menm yon dènye omaj zanmi ak fanmi majistra a pap gen chans ba li. Se posib pou bandi yo fouye twou mete kò a oubyen abandone l nan bwa pou chen manje.
Renama gen anpil enkyetid sou sitiyasyon jij yo k ap sibi san rete zak kidnapin ak ansasinay dènye jou sa yo anba men nèg ak zam. Nan sans sa, Renama mande otorite yo ki la pou bay sekirite pou pran tout dispozisyon pou mennen devan lajistis tout moun ki patisipe nan zak lach, san pidè sa a.
Renama ap kontinye mande tout jij yo rete veyatif pandan lap kontinye ekzije
otorite yo pran mezi pou garanti sekirite tout moun san paspouki.
Renama kwè nan lavi miyò pou tout Moun, tout majistra yo.
Renama pwomèt tout Majistra, kanpe tankou chita, l ap kontinye batay pou
kondisyon travay ak lavi yo chanje.
Renama konseye yo anpil pridans move van an gen pou l pase sou peyi d Ayiti kote lajistis va sèl kòk chante.
Viv Ayiti !
Viv Lajistis !
Loubens ELYSÉE
Prezidan
Consulter +
