Pòtoprens, 8 me 2024 [AlterPresse] --- Byen bonè mèkredi maten 8 me 2024 la, nan yon tantativ kidnaping, bandi ak zam asasinen anba bal nan Tijo, Pòtoprens, ofisye polis fanm Barbara Fecu, 32 zyèm pwomosyon, nan moman li t ap mennen pitit li lekòl. Ofisye polis Barbara Fecu t ap travay nan direksyon jeneral lapolis nasyonal d Ayiti a, dapre sa Sendika nasyonal polisye ayisyen yo (Synapoha) rapòte.
Zak kriminèl mèkredi maten 8 me 2024 la fè 17 polisye nasyonal, bandi ak zam asasienen depi lane 2024 la koumanse. Dwe gen dispozisyon konsekan pou pwoteje polisye nasyonal yo nan lari a. Se sa Sendika nasyonal polisye ayisyen yo (Synapoha) di l swete sou AlterPresse ak AlterRadio.
Madi apremidi 7 me 2024 la, 4 pasaje yon ti bis, ki fè ale vini Pòtoprens/Kafou, mouri anba bal epi plizyè lòt pasjaje blese ak bal tou, lè kout zam, ki sanble ta soti nan yon machin blennde, tire sou machin transpò piblik yo te ladan an, nan zòn Matisan. Se sa Asosyasyon pwopriyetè ak chofè d Ayiti yo (Apch) konfime bay platfòm AlterPresse ak AlterRadio.
Se pa premye fwa pasaje, ki nan machin transpò piblik, sibi mòd atak sa yo. Sa k pase madi apremidi 7 me 2024 la nan Matisan an, se yon lòt zak kriminèl ki kontinye pase lavi moun anba pye. Se konsiderasyon sou AlterPresse ak AlterRadio Asosyasyon pwopriyetè ak chofè d Ayiti yo / Apch.
Jis rive mèkredi 8 me 2024 la, lapolis nasyonal la poko an mezi di ki sa k pase madi apremidi 7 me 2024 la, nan zòn Matisan.
Se depi dat premye jen 2021 gang ak zam gen kontwòl Matisan, kote y ap fè chofè machin traspò piblik yo peye dwa pasáy pou yo ka travèse.
Anyen poko fèt pou retabli sekirite a nan zòn metwopoliten Pòtoprens lan, ki anba laterè ak lòt zak vyolans gang ak zam yo. Pwoblèm sekirite a toujou rete yon gwo defi, ni nan zòn metwopoliten Pòtoprens lan, ni nan depatman Latibonit lan. Jiska prezan, Konsèy prezidan pou tranzisyon an poko janm pran okenn dispozisyon pou met bout nan zak kriminèl gang ak zam yo.
Madi 7 me 2024 la, 2 moun lapolis sispèk ki ta nan alyansáy ak gang ak zam mouri nan boukantay kout zam ak lapolis, nan ri Maslen, Pòtoprens. Lapolis nasyonal la di li rive sezi yon zam nan men 2 sispèk yo, ki te nan yon machin san plak. 2 sispèk yo t ap eseye kidnape yon moun nan ri Maslen, Pòtoprens. Gen lòt sispèk, ki te nan machin san plak la, ki rive chape, dapre lapolis.
Ant jedi 25 avril pou rive dimanch 5 me 2024 la, se plis pase 5 mil moun ki sètoblije kouri kite lakay yo, nan zòn metwopoliten Pòtoprens lan, akoz laterè gang ak zam yo, pou al chèche refij lòt kote. Moun sa yo t ap viv nan katye Solino, Dèlma 28, Kafou Peyan, ri Sen Maten, nan Pòtoprens. Yon bon pati nan moun deplase sa yo ale nan sant akèy Pòtoprens oswa al pran refij nan komin Taba, Dèlma ak Kwadèboukè, dapre Òganizasyon entènasyonal pou migrasyon yo (Oim).
Mèkredi 8 me 2024 la, se dat gouvènman defakto Ariel Henry an te bay pou manm Lakou dèKont yo, ki gen manda yo fini, kontinye okipe pòs yo a. Poko gen enfòmasyon, ki di ki desizyon Konsèy prezidan pou tranzisyon an pral pran sou kozman manda manm lakou dèkont yo, ki sanse bout koumansman lane 2024 la. [ppsf emb rc apr 08/05/2024 14:27]
Consulter +
